"Jan daýysyń shyǵady". BQO-da tanymal saksafonshy jol apatynan qaıtys boldy

Batys Qazaqstan oblysynda tanymal saksafonshy Dáýlet Shámelov jol apatynan qaza tapty. Bul týraly "Ýralskaıa nedelıa" basylymy habarlady.

Oqıǵa 25 qyrkúıek kúni Inder-Oral tas jolynda Kóneketken kentiniń mańynda bolǵan. Jol apatynan bes adam zardap shegip, Dáýlet Shámelov jedel járdem kóligi kelgenshe oqıǵa ornynda qaıtys bolǵan.

Dosy, "Terekti jańalyǵy" gazetiniń bas redaktory Ádilet Orynbasarovtyń aıtýynsha, uıaly baılanystyń nashar bolýynan jedel járdem kóligin uzaq ýaqyt boıy shaqyra almaǵan. Ol óziniń Facebook jelisindegi paraqshasynda bolǵan oqıǵa jaıly oıyn jazdy.

"Iıa, ajal aıtyp kelmeıdi. Biraq búgingi oqıǵa meniń tarapymnan zańdy saýaldar týyndatty.

Aldymen, baıaǵy uıaly baılanystyń bolmaýy. Oıbaı, damyǵan Qazaqstan, onlaın oqý, álemniń úzdik 30 memleketiniń qatary dep urandatamyz. Qanshama aýyldar ǵalamtor bylaı tursyn, kádimgi sapaly uıaly baılanysqa zárý. Muqtaj! Adam jany qyl ústinde turǵanda jedel járdemge telefon shalyp, kómekke shaqyraıyn deseń baılanys joq! Joq! Jan daýysyń shyǵady. Biraq tappaısyń!

Odan keıin jyr bolǵan medısına máselesi. Aınalaıyn, joǵarydaǵy kókeler! Estıtin memlekettiń qyzmetkerleri! Aýyldaǵy medısınanyń hálin bilesizder me sizder? Saǵattap kútken jedel járdemniń háli nashar adamdy salyp, kólikke deıin jetkizer qarapaıym zembili joq. Dem alýy qıyndaǵan adamǵa salatyn dárilik preparattar taba almaı baıǵus dárigerler sarsańǵa tústi. Bir jedel járdem kóligi oqýshylardy tasyp júr. Mine, damyǵan el! Medbıkelerdiń sharasyzdyǵyn, qoldary baılaýly ekendigin kórip búıtken medısınań qursyn dep aıqaılaǵym keldi" dep jazdy marqumnyń dosy, Ádilet Orynbasarov.

Oblystyq densaýlyq saqtaý basqarmasynyń baspasóz qyzmeti jol kólik apatynyń bolǵanyn rastady.

"2020 jyldyń 25 qyrkúıeginde saǵat 13:40-ta Inder-Oral tas jolynda Kóneketken kentiniń mańynda jedel járdemge jol apaty týraly habarlama kelip tústi. Onda bes adam boldy. 1995 jyly týǵan er adam, Chapaev aýylynyń turǵyny jedel járdem kelgenshe qaıtys boldy" delingen habarlamada.