"Kredıt keshirilsin". Almaty qalasyndaǵy mıtıng (fotoreportaj)

Búgin, 13 qyrkúıek "Demokratııalyq partııa" qurý boıynsha bastamashyl top jetekshisi, qoǵam belsendisi Janbolat Mamaı jáne onyń jaqtastary Almaty qalasy Shevchenko men Ýálıhanov kóshesiniń qıylysynda ornalasqan Shoqan Ýálıhanov alańynda eskertilgen mıtıng ótkizdi. Alańda bolǵan "Qamshy" tilshisi mıtıngten arnaıy fotoreportaj daıyndady. 

Mıtıngke 200-ge jýyq belsendi qatysyp, "Halyqqa bir rettik nesıelik amnıstııa jarııalaý", "Jer sheteldikterge jalǵa berilmeýge tıis!", "Bankterge emes, mıllıondaǵan halyqqa qoldaý kórsetilsin!", "Maks Bokaevqa bostandyq" degen talaptaryn aıtty. 

Qoǵam belsendisi Janbolat Mamaı bılik halyqtyń tilegen oryndamaıynsha, mıtıngter jalǵasa beretinin jetkizdi.

– Biz mıtıngti resmı túrde eskertý formatynda ótkizip jatyrmyz. Eshkimdi ustamaı, qýdalamasa adam kóbirek shyǵyp, ózderiniń talaptaryn qoısyn dedik. Biz búgingi mıtıngke barynsha daıyndaldyq, halyqty shaqyrdyq. Árbir ótken mıtıngtiń nátıjesi bolady. Kóbisi mıtıngten qorqyp qalǵan, mıtıngti estise tóbe shashtary tik turady. Mıtıng eskertilgen formatta, zańnyń sheńberinde ótti, – deıdi Mamaı.