Qazaqstandyqtardy «Nur Otan»-nyń 216 saılaýaldy baǵdarlamasyna usynys engizýge shaqyrady

Partııanyń baspasóz qyzmetiniń málimetinshe, saılaýaldy baǵdarlamalardyń jobalary elimizdiń óńirleriniń, onyń ishinde eń shalǵaı eldi mekenderindiń turǵyndarymen kezdesý qorytyndysy boıynsha qalyptasqan naqty problemalardyń kartasy negizinde ázirlengen.

Sonymen, Shyǵys Qazaqstan oblysynyń saılaýaldy baǵdarlamasynyń jobasynda oqýshy oryndarynyń tapshylyǵyn azaıtý maqsatynda jańa balabaqshalar men mektepter salý mindeti qoıylyp otyr. Jezqazǵan qalasynda jumysqa ornalasý problemalary jeke baǵytpen kórsetilgen. Munda turaqty jumys oryndaryn ashý úshin óńdeýshi ónerkásip salasynda birden birneshe jańa kásiporyn salý usynylady.

Shymkent qalasy boıynsha saılaýaldy baǵdarlama jobasynda Densaýlyq saqtaý salasyna erekshe kóńil bólingen. Partııa qalalyq máslıhatqa saılaýda jeńiske jetken jaǵdaıda, megapolıste birden 10 jańa medısınalyq ortalyq salý, sondaı-aq 36 medısınalyq mekemede materıaldyq-tehnıkalyq bazany jańartý josparlanýda.

Soltústik Qazaqstan oblysynda partııanyń aımaqtyq saılaýaldy baǵdarlamasy jobasynyń bir bóliminde jol ınfraqurylymyn jaqsartý kózdelgen. 2021 jyly oblystyq jáne aýdandyq avtojoldardyń keminde bes júz shaqyrymyn jóndeý usynylady.

Sondaı-aq, osy aptada búkil el boıynsha partııaishilik praımerızdiń ekinshi kezeńi –úgit-nasıhat jumystary bastaldy. Úgit-nasıhat naýqany barysynda árbir kandıdat naqty eldi mekenderdiń problemalaryn sheshý joldaryna qatysty óz kózqarasyn usynýy tıis.14-30 qyrkúıek aralyǵynda jarııa pikirsaıystar onlaın rejıminde ótedi.

Osyǵan baılanysty «Nur Otan» partııaıasy Tóraǵasynyń birinshi orynbasary Baýyrjan Baıbek óńirlik fılıaldarmen keńeıtilgen keńes ótkizip, onyń barysynda Prezıdenttiń Qazaqstan halqyna Joldaýy aıasyndaǵy partııa jumysynyń negizgi baǵyttary talqylandy.

«Memleket basshysy Qasym-Jomart Kemeluly Toqaev óz Joldaýynda azamattarymyzdyń kópshiligin tolǵandyratyn áleýmettik máselelerdi sheshýdiń naqty baǵyttary men tetikterin atap ótti. Prezıdent 140-qa jýyq naqty tapsyrma berdi. «Nur Otan» partııasy Memleket basshysy jarııalaǵan bastamalardyń iske asyrylýyna jergilikti jerlerde qatań monıtorıng júrgizedi. Elbasy, partııa Lıderi Nursultan Ábishuly Nazarbaevtyń tapsyrmasy boıynsha, praımerız barysynda jınalǵan halyqtyń usynystary men Prezıdent Joldaýynda qoıylǵan mindetterdi eskere otyryp, bizdiń barlyq saılaýaldy baǵdarlamalarymyzdyń jobalary pysyqtalady», - dedi Baýyrjan Baıbek.

Eske sala keteıik, jalpy respýblıkalyq partııaishilik praımerızge qatysýǵa 11 myńǵa jýyq kandıdat tirkelgen, olardyń ortasha jasy 43 jasty quraıdy. Onyń ishinde 37%-y – áıelder, 29,6%-y – 35 jasqa deıingi jastar.

Praımerızdiń basty maqsaty – aldaǵy Májilis pen barlyq deńgeıdegi máslıhattar saılaýyna partııalyq tizimderge engizý úshin qoǵamnyń senimi men qoldaýyna ıe bolǵan bedeldi partııa kóshbasshylaryn anyqtaý.