25 Tamyz, 2020 NEWS

Baıbek praımerızdegi arnaıy sanıtarlyq talaptar týraly aıtty

«Nur Otan» partııasynda praımerız ótkizý kezinde saqtalýy tıis arnaıy sanıtarlyq-epıdemıologııalyq talaptar qabyldandy. Olardy barlyq uıymdastyrý komıtetteri, kandıdattar men daýys berýshiler basshylyqqa alýy kerek. Bul týraly «Nur Otan» partııasy tóraǵasynyń birinshi orynbasary Baýyrjan Baıbek Facebook-tegi paraqshasynda habarlady.

Baıbek praımerızdegi arnaıy sanıtarlyq talaptar týraly aıtty

«Qurmetti dostar! Partııa Lıderi Nursultan Nazarbaevtyń tapsyrmasy boıynsha respýblıkalyq partııaishilik irikteý – praımerız ótkizip jatqanymyzdy jaqsy bilesizder.

Búgingi kúni oǵan qatysýǵa 7670 azamat ótinish berdi. Olardyń 34% - áıelder, 24,1% - 35 jasqa deıingi jastar. Bastaýysh partııa uıymdary 2631 adamdy usynsa, al 5039 kandıdat – ózin-ózi usynǵandar.

Tirkeý osy aptanyń sońyna deıin jalǵasady. 7 qyrkúıekten bastap úmitkerlerdiń úgit jumysy bastalady, onyń ishinde jarııa pikirsaıystar – 14-30 qyrkúıek aralyǵynda bolady.

Sonymen birge qazirgi epıdemıologııalyq ahýal belgili bir shekteýler týdyryp, praımerız ótkizý úshin tıisti jaǵdaı jasaýdy talap etýde.

Bárimiz úshin eń aldymen azamattarymyzdyń densaýlyǵy men amandyǵy mańyzdy.

Osyǵan baılanysty bas memlekettik sanıtarlyq dáriger Aıjan Esmaǵambetovamen birlesip Praımerız ótkizý kezinde arnaıy sanıtarlyq-epıdemıologııalyq talaptar engizý týraly qaýly qabyldadyq. Ony barlyq uıymdastyrý komıtetteri, kandıdattar jáne daýys berýshiler basshylyqqa alýy tıis.

Sonymen, partııaishilik irikteýge qatysýshylar maskalardy, qolǵaptardy, zararsyzdandyrý quraldaryn paıdalanýǵa, keminde 2 metr áleýmettik aralyqty saqtaýǵa, qol alysyp amandaspaýǵa jáne basqa da saqtyq sharalaryn ustanýǵa mindetti.

Barlyq iske qosylǵan úı-jaılarda sanıtaızerlerdiń, baılanyssyz termometrlerdiń qajetti mólsheri qamtamasyz etiledi, zararsyzdandyrǵysh quraldar paıdalanyla otyryp, turaqty túrde ylǵaldy tazalaý júrgiziledi jáne keminde táýligine 2 ret jeldetiledi.

Úgit barysynda flaerlar men býkletterdi tek maska taǵyp, qolǵap kıip qana taratý qajet.

Kandıdattardyń partııa múshelerimen kezdesýleri áleýmettik jelilerde beınekonferensııa arqyly, ashyq alańdarda nemese jeldetiletin úı-jaılarda qatysýshylar arasyndaǵy qashyqtyqty saqtap, maska taǵa otyryp, ótýi múmkin.

Kandıdattardyń jarııa debattary 1224 obektide onlaın-formatta jáne áleýmettik aralyqty saqtaı otyryp ótkizilýi tıis.

2545 daýys berý ýchaskesinde kabınalar men ýrnalar, sondaı-aq bıýlletenderdi berý oryndary bir birinen keminde eki metr araqashyqtyqta bolýy tıis.

Jalpy, biz engizgen «Praımerız» aqparattyq júıesi partııaishilik irikteýdiń barlyq kezeńin ótkizýge múmkindik beredi, onyń ishinde tirkeýdi, úgitti jáne daýys berýdi onlaın rejımdi ótkizýge bolady. Júıe qoldanýǵa jeńil, saılaýshynyń «tańdaý qupııasyn», sondaı-aq syrttan aralasýdan qorǵaýdy qamtamasyz etedi. Sondyqtan is-sharalardyń basym bóligin biz osy múmkindikterdi paıdalana otyryp ótkizýge tyrysamyz», - dep jazdy Baýyrjan Baıbek.

Praımerızdiń uıymdastyrýǵa qatysty tustary jaıly primaries.kz jáne nurotan.kz saıttarynan tolyǵyraq tanysa alasyz. Partııanyń baspasóz qyzmeti taratqan aqparatqa sáıkes, praımerız ótkizý, sondaı-aq kandıdattarǵa uıymdastyrýshylyq jáne quqyqtyq qoldaý máseleleri boıynsha «Nur Otan» partııasy 8 (800) 080 4441 arnaıy jedel jelini iske qosty.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir