Atyraý oblysynyń ákimi Mahambet Dosmuhambetov jas dárigerlermen kezdesti

Internatýra jáne rezıdentýra bitirip kelgen 55 maman Atyraý qalasyndaǵy jáne aýdandardaǵy emdeý mekemelerine jumysqa kiristi. Bul týraly Atyraý oblystyq kommýnıkasııalar qyzmeti habarlady.

Jas mamandarmen kezdesý barysynda aımaq basshysy Mahambet Dosmuhambetov medısına salasynyń aýyr kezeńdi bastan ótkerip jatqandyǵyn atap ótti.

– Qazirgi ýaqytta oblysta 9000 medısına qyzmetkeri bolsa, onyń ishinde 2000 medısına mamany pandemııamen kúreske jumyldyrylyp otyr. Onyń ústine, óńirde 278 dáriger jetpeıdi.

Búgingi tańda Jylyoı, Qurmanǵazy aýdandarynda aýrýhanalar salynýda. Sonymen birge, Atyraý kardıoortalyǵyna japsarlas ǵımarat ashylady. "Medısına jáne bilim salasy mamandaryn daıyndaýǵa qashan da basymdyq beremiz, – degen Atyraý oblysynyń ákimi Mahambet Dosmuhambetov jas mamandardy áleýmettik qoldaý jalǵasatynyn aıtty.

Atyraý oblysynyń densaýlyq saqtaý basqarmasynyń basshysy Nurlybek Qabdyqaparov buǵan deıin habarlaǵandaı, aımaqqa jalpy sany 122 jas maman keletinin aıtty. Qazirgi kezde olardyń aldy jumysqa kirisip ketken.

– Koronavırýs indetine baılanysty, jas mamandardan qosymsha kómek bolady dep kútilýde. Mamandardyń jalaqysy zań sheńberinde kórsetilgen deńgeıde tólenedi. Eger ınfeksııalyq nemese provızorlyq stasıonarǵa jumysqa kirisse, mınıstrlik buıryǵyna sáıkes ústemeaqy bólinedi. Emdeý mekemeleri basshylarynan túsken suranysqa saı, mamandar úımen qamtamasyz etiledi, – dedi Atyraý oblysynyń densaýlyq saqtaý basqarmasynyń basshysy Nurlybek Qabdyqaparov.

Nasyr men Albına Ońǵarbaevtar qyzyl aımaqta jumys istep jatqan otbasylyq jup. Dárigerlikti tańdaǵan jas mamandar Aqtóbeniń týmalary.

– Jumysqa 20 shilde kúni kiristik. Atyraý oblystyq aýrýhanasy janyndaǵy provızorlyq stasıonardamyz. Naýqastardy qabyldap, jaǵdaılaryn baqylaımyz. Aýrý tarıhyna qatysty qujattar toltyramyz. Qazirgi ýaqytta oblystyq ákimdik jaldap bergen "Dostyq" qonaq úıinde turamyz. Aýrýhanaǵa avtobýs tasymaly uıymdastyrylǵan. Búginde ahýal turaqtalyp, naýqastar sany azaıýda. Dese de, osyndaı qıyn jaǵdaıda halyqqa kómek kórsetip jatqanymyzǵa qýanyshtymyz, – deıdi Nasyr men Albına Ońǵarbaevtar.

Oblystyq aýrýhananyń provızorlyq aýrýhanasynda jumys istep jatqan mamannyń taǵy biri – Dmıtrıı Lı. Hırýrg mamandyǵyn bitirgen Dmıtrıı Lı jataqhanaǵa ornalastyrǵanyn aıtady.

– Úsh mezgil as-aýqatpen, qajetti qorǵanys kıim-keshektermen qamtamasyz etildik. Tájirıbemiz bolmaǵandyqtan, tálimgerlermen keńese otyryp, em-sharasyn taǵaıyndaımyz, – deıdi Dmıtrıı Lı.

Qazirgi ýaqytta Aqtóbe medısınalyq akademııasyn aıaqtaǵan 53 mamannyń 11-i stasıonarlyq aýrýhanaǵa, 27-si bastapqy medısınalyq kómek kórsetetin emhanalarǵa jumysqa kiristi. Qalǵan 15 maman aýdandarǵa jiberildi.