Qazaqstan densaýlyq saqtaý mınıstrligi ótken táýlikte 1708 adamnan koronavırýs anyqtalǵany týraly habarlady.

Ol naýqastardyń 1010-y klınıkalyq belgileri joq tasymaldaýshy. Bul – sońǵy 20 kúndegi táýlik ishindegi statıstıkalardyń eń joǵarylarynyń biri.

Aımaqtar boıynsha táýliktegi epıdemıologııalyq jaǵdaı tómendegideı (jalpy/sımptomsyz):
Nur-Sultan qalasy - 120 / 65
Almaty qalasy - 223 / 102
Shymkent qalasy - 80 / 50
Aqmola oblysy - 34 / 22
Aqtóbe oblysy - 87 / 54
Almaty oblysy - 109 / 76
Atyraý oblysy - 243 / 173
Shyǵys Qazaqstan oblysy - 154 / 95
Jambyl oblysy - 68 / 53
Batys Qazaqstan oblysy - 95 / 49
Qaraǵandy oblysy - 120 / 67
Qostanaı oblysy - 65 / 40
Qyzylorda oblysy - 61 / 31
Mańǵystaý oblysy - 76 / 69
Pavlodar oblysy - 59 / 16
Soltústik Qazaqstan oblysy - 56 / 21
Túrkistan oblysy - 58 / 27

Aımaqtar arasynda vırýstyń taralýy jóninen Atyraý birinshi orynda tur. Oblysta 7393 KVI deregi tirkeldi. Eń tómengi kórsetkish Qostanaı oblysynda. Ol jaqta 1500 adamnan vırýs anyqtalǵan.

El boıynsha KVI juqtyrǵandardyń jalpy sany – 56455. Osy ýaqytqa deıin 32 500 adam indetten aıyqsa, 264 adam qaıtys bolǵan. Densaýlyq saqtaý mınıstrligi qaıtys bolǵandar týraly derekti aptasyna bir ret habarlaýǵa kóshken. Sońǵy derekte 30 maýsym men 6 shilde aralyǵyndaǵy jaǵdaılar habarlandy. Ol kezde 76 adam koronavırýstan kóz jumdy delingen.

Qazaqstanda sondaı-aq pnevmonııa indeti órship tur. Sońǵy kúnderi elde bul aýrýdan qaıtys bolǵandar tym kóbeıgen. Qarapaıym adamdardan bastap, óner jáne mádenıet salasynyń ókilderi, laýazym ıeleri, dárigerler osy syrqattan kóz jumyp jatyr.

Qazaqstandyq jáne sheteldik mamandar pnevmonııa shyn máninde koronavırýs ekenin málimdegen. Alaıda bılik bul jaǵdaıdy KVI-dan bólip qarastyryp jatyr.

Qazaqstanda pnevmonııadan kóz jumǵandardyń naqty sany jarııalanbaǵan.  Tek ótken 6 aıdaǵy jaǵdaı týraly keltirilgen sıfrlar ártúrli. Densaýlyq saqtaý mınıstri Alekseı Soı 9 shildede ótken brıfıngte sońǵy alty aıda 1 172 adamnyń osy dertten kóz jumǵanyn aıtqan. Al 3 shildede Qazaqstannyń bas sanıtar dárigeri Aıjan Esmaǵambetova elde sońǵy jartyjyldyqta pnevmonııadan 1 772 adam qaıtys bolǵanyn málimdegen.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir