Teńizdegi daý: Nege bastyqtar aýyrmaıdy, jumysshylar aýyrady? (vıdeo)

Áleýmettik jelide Teńiz ken ornynda bolǵan talap sherýiniń vıdeosy paıda boldy. Jumysshylar «Teńizshevroıl» JShS basshylarymen nemese ókilderimen kezdesýdi talap etip otyr, dep jazady Qamshy.kz aqparat agenttigi ATPress-ke silteme jasap

«Úıimizdi kórmegeli úsh aıdaı ýaqyt bolyp ketti, úıde bala-shaǵamyz jylap jatyr» delingen vıdeoda. Sonymen qatar narazy jumysshylardyń boqaýyz sóz aıtyp jatqanyn estýge bolady

«Biz sharshadyq, qashanǵa deıin shydaýymyz kerek, úsh aı túrmede otyrǵan sekildimiz osy sharýany sheshe alatyn bireý kelsin osy jerge. Analız alǵanyna 20 kún ótti, nátıjesi áli joq! Nege bastyqtar aýyrmaıdy, nege jumysshylar aýyrady?» deıdi jumysshylar.

Emosııaǵa erik bergen azamattar túrli sózdermen balaǵat aıtýda. Olar «eger talap oryndalmasa, ashtyq jarııalaımyz» dep otyr.

Aımaqtyq shuǵyl shtabtaǵylar jaǵdaıdyń 30 mamyr kúni eki enshiles kompanııanyń jumysshylary turyp jatqan vahta aýylynda bolǵanyn habarlady. 30-ǵa jýyq adam karantınniń uzaryp ketkenine narazylyq bildirgen. Olar COVID-19 anyqtaýǵa test tapsyrǵan jáne koronavırýs juqtyrǵandarmen baılanysta bolǵandar retinde 14 kúnge oqshaýlanǵan. Ekinshi ret testileýiniń nátıjesi keshigip jatyr, biraq búgin másele sheshilýi kerek.

Atyraý oblysynda koronavırýsty jańadan juqtyrǵan 69 adam bar. Olardyń 54-i Teńiz ken ornyndaǵy merdiger uıymdardyń jumysshylary.