Ánshiler jarnamalaǵan utys oınynyń uıymdastyrýshylary 281 adamdy aldap ketken

Belgili quqyq qorǵaýshy Aıgúl Orynbek óziniń facebook-taǵy paraqshasynda áldekimniń utys oınyna shaqyrǵan beınejazbasyn jarııalap, onyń "musylmanmyn" dep adamdardy aldap júrgenin málimdedi. Qamshy tilshisi utys oınyn uıymdastyrýshylardyń kim ekenin, onyń zańǵa, sharıǵat talaptaryna qanshalyqty saı ekenin anyqtaý barysynda máseleniń bir ushy ánshiler jarnamalap júrgen utys oıyndaryna kelip tireldi.

Vıdeoda belgisiz azamat c5.konkurs_official utys oıny ınvestorlar izdep jatqanyn, ınvestorlardyń salǵan 500 myń teńge aqshasy 10 kúnnen keıin 750 myń teńge bolyp qaıtarylatynyn aıtqan. Sondaı-aq ol munyń bári zańdy ekenin, taraptar kelisim-shartqa otyratynyn de jetkizgen.

– Bul aqsha – sharıǵat talaptary boıynsha adal ári taza. Sizderdiń aqshalaryńyzǵa biz robototehnıka pánine qajetti jabdyqtar alamyz. Biz tek tasymaldaýshymyz. Almatyda belgili bir kompanııamen kelisimge kelip, AQSh-tan sol robottardy ákelemiz. Robottardy alýǵa aqshany biz sizderden alamyz. Iаǵnı paıdany biz de kóremiz, sizder de kóresizder. Sol sebepti ınvestısııa jasaýǵa shaqyramyz. О́te ońaı. Úıde otyryp aqsha tabasyzdar. Eń bastysy – bul haram aqsha emes. Biz alaıaqtyqpen aınalysatyn bolsaq, bulaı ekranǵa shyqpas edik. Bul qaıyrymdylyq qorynyń bir úlesi, – deıdi utysqa shaqyrǵan azamat.

Aıgúl Orynbek haram jolmen aqsha tabý jolyn usynǵan osyndaı adamdarǵa sengen azamattar ınvestısııa retinde salynǵan qarjysyn qaıtara almaı júrgenin jazdy.

"Halal aqsha, asyńdy adalynan ish deıdi, sóıtip otyryp aqsha salǵan ınvestorlaryna óz aqshalaryn qaıtara almaı, "Sharıǵat boıynsha" dep áńgimeni jiberip otyr. Jap-jas bolyp halyqtyń senimine kirip, halyqty aldaǵansha jer tyrmalap aqsha tappaısyń ba? Musylman adam, adamzat balasyna qııanat jasamaıdy! Mine, bizde ósip kele jatqan urpaq nemen aınalysyp júr! Kimniń áńgimelerin tyńdap ósti eken? Muhamedjan Tazabek aǵa sizdiń emes pe? Myna jigittiń ústinen biraz adam shaǵym aıtýda. Ánshiler arqyly lotereıa oınatamyn dep, halyqtan ınvestısııa jınap alǵan!" delingen Aıgúl Orynbektiń jazbasynda.

Qamshy tilshisi vıdeoda kórsetilgen nomerge habarlasqanynda abonent sóndirýli boldy. Whatsapp arqyly jazylǵan habarlamalar jetpedi.

Qamshy tilshisi atalǵan ánshilerge habarlaspaq bolǵanynda, KTK arnasyndaǵy Astarly aqıqat baǵdarlamasynyń kezekti sanynda osy másele qozǵalyp, Roza Álqoja men Aqbota Kerimbekovanyń pikirleri usynyldy.

Atalǵan ánshiler baǵdarlamaǵa shaqyrylǵanymen, ekeýi de kelýden bas tartqan. Alaıda Roza Álqoja beınejazba arqyly másele týraly túsinik bildirgen.

Onyń sózinshe, c5.konkurs_official paraqshasyndaǵy utys oınynyń uıymdastyrýshylary ánshige jarnamaǵa túskeni úshin 1 jarym mln teńge tólegen. Ol jarnamalaǵan utys ádil ári ereje sheńberinde ótken. Ýáde etilgen júldelerdiń bári utys ıelerine tabystalǵan. Tipti ony ánshiniń ózi jeke qadaǵalaǵanyn aıtty. Biraq 9900 teńgelik bılet mólsherden tym kóp satylǵan. Ánshiniń sózinshe, 20 myń 500 shamasynda bılet satylǵan. Sonda utystan jalpy jıyntyǵy 200 mln teńgeden astam tabys túsken bolyp tur. Uıymdastyrýshylardyń bılet sanyn mólsherden tym kóp satýy men ınvestor tartýy unamaǵan soń ánshi ózine deıin ınvestısııa salǵandardyń tıisti qarajatynyń qaıtarylýyna yqpal etip, ýaqyttyń tyǵyzdyǵyn aıtyp uıymdastyrýshylarmen baılanysyn úzgen.

Roza Álqoja bastaǵan utystyń ekinshi kezeńin jalǵastyrǵan Aqbota Kerimbekova arna jýrnalısine baǵdarlamaǵa barmaıtynyn, bul másele boıynsha basyn aýyrtqysy kelmeıtinin aıtqan. Ol telefon arqyly "túımedeıdi túıedeı qylasyzdar, meniń ınvestısııaǵa qatysym joq. Bolar is boldy" dep jaýap bergen.

Jaqsylyq Myrzahan "ınvestısııaǵa qarjy salyp, aldanyp qaldyq" degen azamattardan aryz túskeni týraly derekti de rastady. Búginde olardyń aryzy qaralý ústinde.

Ernar Aıdar TalkLike ıýtýb-jobasyna bergen suhbatynda ózin aldap ketkenderderdiń biri retinde ınvestısııa salýǵa shaqyrǵan vıdeodaǵy azamatty ataǵan. 

Muny Astarly aqıqat baǵdarlamasynyń jýrnalısteri de anyqtaǵan.

Qamshy tilshisimen sóılesken dintanýshy Qaırat Joldybaı sońǵy ýaqytta lotereıany keıbir istermen búrkemeleý beleń alǵanyn aıtty.

– Qazir ánshilerimiz instagram-daǵy paraqshalary arqyly túrli konkýrstar uıymdastyryp jatyr. Olar lotereıanyń haram ekenin, kóp adamnyń utylyp, taqyrǵa otyratynyn bilgendikten ony konkýrs dep atap júr. Onyń túr-túri shyǵyp ketti. Ol jerde satylyp otyrǵan nárse naryqta anaý aıtqandaı suranysqa ıe emes. Máselen, kitap satylsa, ary ketse 6 aıda 5 myń dana satylýy múmkin. Nemese keıbiri dısk túrindegi ánjınaqty oınatyp júr. Buryn ondaı dıskterdiń maǵynasy, quny boldy, al qazir ınternetti ashsań, bári tolyp tur. Demek dısktiń quny joq. Ol ótpeıtin qajetsiz dúnıe. Sol jaı ǵana dúnıeni konkýrsqa tigip, sony jeleý etip, kózboıaýshylyq jasaıdy. Adamǵa satyp alǵan zattyń mańyzy bolýy kerek. Al onyń mańyzy joq bolsa, taýar alaıaqtyq úshin qoldanylyp jatqan qural ǵana. Mundaı mańyzsyz quraldy satý jáne ony naryqtaǵy qunynan qymbatqa satý – sharıǵat boıynsha haram. Al ánshilerimizdiń uıymdastyryp júrgeni – halyqty ádemi aldaý. Bálkim keıbir ánshiler bilmeı, qaıyrymdylyq úshin, oqyrmandaryn arttyrý úshin osyndaı áreketke baryp jatqan bolar. Biraq qalaı bolǵanda da sharıǵatta mundaıǵa tyıym salynǵan. Bundaı nárseden aýlaq bolǵan jón. Al qaıyrymdylyqty "men de utyp alyp qalaıyn" degen nıetpen jasamaıdy. Áý bastan nıet qaıyrymdylyq jasaý bolýy kerek. Qolynan sytylyp shyǵyp ketken soń basqa bireý utyp alsa, qaıyrymdylyq bola salsyn deý – qaıyrymdylyq emes. Ári ony shynaıy muqtaj adam alatynyna eshqandaı kepildik joq. Sondyqtan qaı jaǵynan alǵanda da konkýrstar qaıyrymdylyqqa jatpaıdy, – deıdi dintanýshy.