Almatyda qoǵamdyq jumysqa tartylǵandardyń jalaqysy 85 myń teńge mólsherinde bekitildi

Almatyda «Eńbek» baǵdarlamasy aıasynda ýaqytsha jumys isteıtin jumyssyzdarǵa qoldaý kórsetiledi, dep QazAqparat habarlady.

Almaty qalasy halyqty jumyspen qamtý ortalyǵynyń dırektory Dılıara Imanqulovanyń aıtýynsha, búgingi kúnge deıin qoǵamdyq jumystarǵa tartylǵandarǵa eń tómengi jalaqy (aıyna 63,350 teńge) tólenetin.

– Tótenshe jaǵdaıǵa baılanysty jeke uıymdardyń qyzmeti toqtap tur. Sáıkesinshe, jumyssyzdar sany kóbeıýde. Áleýmettik qoldaý jáne halyqty qoǵamdyq jumystarǵa tartý maqsatynda basqarma basshysynyń buıryǵymen qoǵamdyq jumystarǵa qatysýshynyń jalaqysy kóterildi. Aıyna 85 myń teńge mólsherinde bekitildi, – dedi Dılıara Imanqulova.

Jalpy qoǵamdyq jumysqa 12 myń adamdy jiberý josparlanǵan. Qazirgi ýaqytta 2290 jumysshy tartyldy.

– Bul tek kóshelerdi, saıabaqtardy, alańdardy tazartý ǵana emes, munda eriktiler qyzmeti de qarastyrylǵan. Iаǵnı, qarttar men múgedekterge qaraý sııaqty basqa da jumys túrleri bar, – dedi ol.