Kım Chen Yn Phenıandaǵy tyńaıtqysh zaýytynyń lentasyn qıdy

Soltústik Koreıanyń memlekettik KCNA aqparat agenttigi senbi kúni Kım Chen Yn Phenıannyń soltústigindegi tyńaıtqyshtar shyǵaratyn zaýyttyń ashylý saltanatyna qatysqanyn málimdedi. Bul týraly Qamshy tilshisi BBC jáne The Sun basylymyna silteme jasap habarlaıdy.

20 kún úzilisten soń jergilikti BAQ Soltústik Koreıa basshysynyń sýretterin jarııalady. Memlekettik aqparat quralynyń jazýynsha, tyńaıtqysh zaýytynyń lentasyn qıǵan kezde Kım Chen Yn kóńildi bolǵan. Zaýyttyń ashylý saltanatyna Soltústik Koreıa lıderiniń qaryndasy Kım Io Chjon da qatysqan. Bul aqparattyń naqtylyǵyn BBC de, Reuters agenttigi de óz betinshe anyqtaı almaǵanyn habarlady. 

Alaıda sońǵy saǵattarda brıtanııalyq The Sun basylymy Kım Chen Ynnyń lenta qıǵan sátiniń fotolaryn alǵashqylardyń biri bolyp jarııalady. 

Aıta keteıik, buǵan deıin Soltústik Koreıanyń buqaralyq aqparat quraldary Kım Chen Ynnyń Ońtústik Afrıka prezıdentine 27 sáýirde joldaǵan quttyqtaý haty men Phenıan qurylysshylaryna jazǵan alǵys hatyn jarııalaǵan bolatyn.  

36 jastaǵy dıktator 11 sáýirden beri kórinbeı ketken soń, oǵan qatysty túrli qaýesetter tarap, onyń júrek otasynan kóz jumǵany jaıynda aqparat paıda boldy, tipti, onyń áınek tabytta jatqan fotosy áleýmettik jelilerde keń taraldy. Phenıannan qashyp shyqqan zań shyǵarýshy qyzmetker Soltústik Koreıa lıderiniń ótken aptada ólgenin málimdedi. Al birneshe kún buryn Kım Chen Ynnyń otbasylyq poıyzynyń jerserikten túsirilgen sýreti jarııalanyp, onyń tiri ekeni týraly Ońtústik Koreıa prezıdentiniń keńesshisi suhbat berdi. Soltústik Koreıa basylymdary Kım Chen Ynnyń qurylysshy jumyskerlerge alǵys hat joldaǵanyn jazdy. Al, 25 sáýir kúni Qytaı medısınalyq tobynyń Soltústik Koreıa astanasy Phenıanǵa jiberilgenin habarlaǵanbyz. Sonymen birge, Kım Chen Ynnyń ómirine úlken qaýip tónip turǵanyn jazǵan CNN aqparatyn da jarııaladyq. Eger Kım Chen Yn kóz jumsa, ornyna qaryndasynyń kelýi múmkin ekenin jáne Soltústik Koreıa basshysynyń ólimi ıadrolyq soǵys qaýpin týdyratynyn jazǵanbyz.