BBC Qytaıda taralǵan jańa vırýs týraly jazdy

Qytaıda paıda bolǵan qupııa vırýsty juqtyrǵandardyń sany resmı derekterge qaraǵanda áldeqaıda kóp, dep jazady bbc.

Búginde koronavırýsqa shaldyǵýdyń 60 jaǵdaıy anyqtalǵan. Alaıda brıtandyq ǵalymdardyń pikirinshe, vırýsty juqtyrǵandar sany 1700-ge jýyqtaǵan.

О́tken jyldyń jeltoqsan aıynda Qytaıdyń Ýhan qalasynda eki adam tynys alý aýrýlarynyń saldarynan qaıtys bolǵan.

Ǵalym, aýrý oshaqtaryn zertteýshi professor Nıl Fergıýson "bir apta burynǵyǵa qaraǵanda aıtarlyqtaı alańdaýly" ekenin jasyrmaıdy. Ol mundaı qorytyndyǵa Ulybrıtanııa úkimeti men Dúnıejúzilik densaýlyq saqtaý uıymdaryna keńes beretin London ımperatorlyq kolledjindegi MRC Juqpaly aýrýlardy jahandyq taldaý ortalyǵy júrgizgen zertteý nátıjesi boıynsha kelgen.

Búginde Sıngapýr men Gonkong qalalaryndaǵy áýejaı qyzmetkerleri Qytaıdyń Ýhan qalasynan kelgen jolaýshylardy tekserip jatyr. AQSh bıligi de juma kúni San-Fransısko, Los-Andjeles jáne Nıý-Iorktegi úsh iri áýejaıdy teksergen.

Dese de professor Fergıýson "dabyl qaǵýǵa áli erte" dep otyr.

Al qytaılyq sheneýlikter vırýstyń bir adamnan ekinshisine juǵýy jaǵdaıynyń bolmaǵanyn, vırýstyń Ýhan qalasyndaǵy teńiz ónimderi men jabaıy tabıǵat bazarynda janýarlardan shyqqanyn alǵa tartady. 

Dúnıejúzilik densaýlyq saqtaý uıymynyń qytaılyq bıýrosynyń habarlaýynsha, jańa koronovırýs jaıynda áli de kóptegen zertteýler júrgizý qajet. Qazir onyń qalaı juǵatyny, klınıkalyq belgileri, qanshalyqty taralǵany belgisiz bolǵandyqtan, naqty bir tujyrym aıtý qıyn.

Naýqastardan alynǵan vırýstyq synamalarǵa júrgizilgen zerthanalyq taldaýlarǵa qarap, Qytaı men Dúnıejúzilik densaýlyq saqtaý uıymynyń resmı ókilderi ınfeksııa – "koronavırýs" degen qorytyndyǵa kelgen.

Koronavırýstar – bul vırýstardyń keń toby. Olardyń tek altysy ǵana adamdarǵa juǵady. Al qazirgi vırýs onyń jetinshisi ekeni anyqtaldy.

Vırýstyń jeńil túri tumaý retinde bilinse, aýyr formasy koronavırýsqa ulasatyn respıratorlyq sındromǵa aınalady.

2002 jyly Qytaıda indettiń aýyr formasyna shaldyqqan 8 098 adamnyń 774-i kóz jumǵan.