Parlament kópbalaly otbasylardyń járdemaqysyna qatysty zańdy qabyldady

Senat kópbalaly otbasylarǵa tabysyna qaramastan memlekettik járdemaqy tóleýdi kózdeıtin zańdy qabyldady, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

Búgin senatta keıbir zańnamalyq aktilerge mindetti áleýmettik saqtandyrý, áleýmettik qamsyzdandyrý jáne densaýlyq saqtaý salasyndaǵy memlekettik-jekemenshik áriptestik máseleleri boıynsha ózgerister men tolyqtyrýlar engizý týraly zań jobasy eki oqylymda qaralyp, qabyldandy.

Qujatta kópbalaly otbasylarǵa tólenetin járdemaqy men ataýly áleýmettik kómekke qatysty ózgerister kózdelgen.

"Búginde elimizde ataýly áleýmettik kómek alyp júrgen 1 mıllıon 655 myń  adam bar, sonyń 1 mıllıonnan astamy – balalar. Sonyń ishinde, 60%-ten astamy – kópbalaly otbasylardyń balalary. Sondyqtan biz kópbalaly otbasylarǵa, ıaǵnı 4 jáne odan da kóp kámeletke tolmaǵan balalary bar otbasylarǵa tabysyna qaramastan bólek járdemaqy engizýdi kózdep otyrmyz", - dedi eńbek jáne halyqty áleýmettik qorǵaý mınıstri Birjan Nurymbetov.

Memlekettik járdemaqy bala sanyna qaraı saralanady:

• Tórt balasy bar otbasylarǵa –  42 496 teńge;
• bes balaǵa – 53 127 teńge;
• alty balaǵa – 63 757 teńge;
• jeti jáne odan da kóp balalarǵa – 74 388 teńge.

Budan bólek, ataýly áleýmettik kómektiń qoldanystaǵy júıesi qaıta qaraldy. Endi ataýly áleýmettik kómek qazirgideı 6 nemese 12 aıǵa emes, toqsan saıyn taǵaıyndalady.

"Ataýly áleýmettik kómek burynǵydaı kedeılik shegi men otbasynyń jan jasyna shaqqandaǵy ortasha tabysynyń aıyrmashylyǵy retinde tólenedi. Máselen, eger de kedeılik shegi 21 myń teńge, al otbasynyń ortasha tabysy 10 myń teńge bolsa, ár otbasyna sol jetispeıtin 11 myń teńge tólenedi", - dep túsindirdi mınıstr.

Taǵy ózgeris – eger otbasynyń eńbekke jaramdy múshesi memleket usynǵan jumystan bas tartsa, ataýly áleýmettik kómek búkil otbasyǵa toqtatylady.

Sonymen qatar, ataýly áleýmettik kómek alǵysy keletin otbasylardyń mal-múlkin esepteıtin ýchaskelik komıssııalardyń da qyzmeti kúsheıtiledi.

Buǵan qosa, ataýly áleýmettik kómek alyp júrgen otbasylardyń balalaryna kepildendirilgen áleýmettik paket beriledi. Iаǵnı, mektep jasyna deıingi balalar azyq-túlik jáne gıgıenalyq quraldarmen qamtylsa, mektep jasyndaǵylarǵa tegin ystyq tamaq, mektep formasy men oqý-quraldary beriledi, kúndelikti mektepke baryp-kelý jol shyǵyndary óteledi. 

Parlament qabyldaǵan zańda múgedekterdi áleýmettik qamsyzdandyrý deńgeıin kóterý máselesi de sheshimin tapqan.

"Kelesi jyldan bastap áleýmettik qyzmetter portalyn iske qosý qarastyrylyp otyr. Portal áleýmettik qyzmetti alýshylar men sol qyzmetti kórsetetinder arasyndaǵy biryńǵaı sıfrlyq alań bolady. Múgedek jandarymyz ońaltý quraldary men qyzmetterdi ózderi tańdaı alady. Qazir biz olarǵa satyp áperip júrgen edik. Endi osy portaldyń kómegimen qalaǵanyn tańdaýǵa múmkindik bar", - dedi vedomstvo basshysy.

Qujatta jazylǵan taǵy bir ózgeris – mindetti zeınetaqy jarnasyna qatysty. Jumys berýshiniń mindetti zeınetaqy jarnasyn engizý merzimi 2020 jyldan 2023 jylǵa aýystyrylyp otyr.