Elimizde 33 gradýs aıaz bolady

Sınoptıkter  19-21 qarasha aralyǵyna arnalǵan aýa raıy boljamyn jarııalady – dep Qamshy.kz aqparat agenttigi habarlaıdy, "Qazgıdromet" RMK baspasóz qyzmetine silteme jasap.

Karsk teńiziniń arktıkalyq aýa massalarynda qalyptasqan antısıklon ońtústik-batysqa qaraı yǵysady. Al 21 qarashada Reseıdiń eýropalyq aýmaǵyndaǵy ortalyq aýdandarǵa jetedi.

"Qazaqstanǵa arktıkalyq teńizden Batys Sibir arqyly sýyq aýa massasy kelip, sonyń áserinen eldiń basym bóliginde kún aıtarlyqtaı sýytady. Soltústik, ortalyq jáne shyǵys oblystarda aýa temperatýrasy -28…-33°S deıin tómendeıdi. Sondaı-aq, keı jerlerde qar jaýyp, burqasyndatady, qatty jel soǵady", – delingen habarlamada.

Odan ózge  batys, ońtústik jáne ońtústik-shyǵys oblystardyń keıbir aımaǵynda qar, kóktaıǵaq jáne tuman bolady dep boljanyp otyr. Bul óńirlerde de kún sýytady, túnde -7…-15°S, qıyr ońtústikte -3…-8°S-qa deıin.