Muǵalimderdi qoldaý úshin 5 trıllıonnan artyq qarjy bólinbek

«Nur Otan» partııasynyń Quqyqtyq keńes músheleri pedagog mártebesin zańnamalyq turǵydan qamtamasyz etý máselelerin talqylady. Keńeıtilgen otyrysqa jetekshi partııanyń basshylary, ustazdar qaýymy men ýákiletti memlekettik organdar ókilderi qatysty.

«Nur Otan» partııasy Tóraǵasynyń birinshi orynbasary Baýyrjan Baıbek táýelsizdik jyldary Tuńǵysh Prezıdent Nursultan Nazarbaevtyń basshylyǵymen elimizde 2000-ǵa jýyq jańa mektep jáne 900 balabaqsha ashylǵanyn atap ótti.

Apatty jaǵdaıdaǵy mektepter sany sońǵy 5 jylda 4 esege azaıdy. Muǵalimderdiń jalaqysy 1997 jyldan beri 17 esege ósken. Elbasynyń tapsyrmasymen árbir qazaqstandyq otbasyǵa qatysy bar "Pedagog mártebesi jaıly" zań jobasy ázirlendi.

«Qazir bilim berý salasynda jarty mıllıonnan astam qazaqstandyq jumys isteıdi. Olardyń 81% áıelder. Tamyz konferensııasynda el Prezıdenti Qasym-Jomart Toqaev ultymyzdyń básekege qabilettiligin arttyrý úshin muǵalim mártebesi bıik deńgeıge kóterilý kerek dep atap ótti. Jyl saıyn dıplomdy mamandardyń sany artqanymen, pedagogtarǵa degen suranys azaımaı otyr. Pedagog mamandardyń 35% basqa salaǵa ketip qalady. Bilikti muǵalimderdi mektepterge, ásirese, aýyldyq jerlerge tartý mehanızmi mardymdy jumys istemeı tur. Bul sheshýge tıisti máselelerdiń bir bóligi ǵana», - dedi Baýyrjan Baıbek.

Onyń aıtýynsha, zań jobasyn ázirleý úshin ǵalymdar, muǵalimder, zańgerler, depýtattar jáne bilim salasy kásipodaqtarynyń ókilderinen quralǵan jumys toby jasaqtalǵan. Jyl boıy elimizde kóptegen kezdesýler ótkizildi, 8600-den asa usynys tústi.

«Partııa músheleriniń 30% - pedagogtar, sondyqtan «Nur Otan» zań jobasynyń ázirlený barysyn erekshe baqylaýda ustap otyr. Pedagog quqyǵyn keńeıtý jáne onyń áleýmettik mártebesin jaqsartý máselesi bar. Áńgime, bárinen buryn, muǵalimderdi materıaldyq turǵydan jáne basqa da yntalandyrý jaǵdaılaryn týǵyzý, qajetsiz tekserýlerden aryltyp, shyǵarmashyl jáne nátıjeli jumys isteýge jaǵdaı jasaý týraly bolyp otyr. Qazirgi ýaqytta ázirlenip jatqan zań jobasy boıynsha taıaý 5 jylda jalaqyny ósirý, ustazdyq sheberlik pen synyp jetekshiligi úshin ústemaqy qosý, eńbek demalysy men basqa da yntalandyrýlardy qamtıtyn 5,2 trıllıon teńge bólinedi dep mólsherlenýde. Bunyń barlyǵy Elbasy men Prezıdent saıasatynyń sabaqtastyǵynyń nátıjesi», - dep atap ótti Baýyrjan Baıbek.

Partııa Tóraǵasynyń birinshi orynbasary Májilistegi «Nur Otan"» partııasy fraksııasy depýtattarynyń jáne jumys tobynyń zań jobasyn talqylaý qorytyndysy boıynsha qosymsha usynystar engizilgenin jetkizdi. Sondaı-aq, oqý júktemesin 16 saǵatqa tómendetý, jer telimderin bólý jáne "Qazaqstannyń eńbek sińirgen ustazy" dárejesine ıe bolǵandarǵa bir jolǵy 2000 AEK kólemindegi tólem tóleý jáne Prezıdenttik olımpıadalar, respýblıkalyq jáne halyqaralyq jarystardyń júldegerlerin daıyndaǵandary úshin 3 aılyq jalaqy berý jaıly usynys aıtyldy.

О́z kezeginde bilim mınıstri Ashat Aımaǵambetov jańa zań jobasynda pedagog quqyǵyn qorǵaý týrasyndaǵy 10 jańa ustanym qarastyrylǵanyn habarlady. Muǵalimderdiń sapalyq quramyn arttyrý úshin magıstr dárejesi barlarǵa 10 AEK kóleminde ústeme, balabaqshalarda eń aldymen oryn bólý jáne basqa da áleýmettik kómekter qarastyrylmaq.

Ashyq pikirtalasqa qatysýshylardyń barlyǵy jańa zań jobasy boıynsha ózderin qyzyqtyratyn saýaldardy qoıa alatynyn aıta ketýimiz kerek. Otyrys barysynda Shymkenttegi №1 mektep-gımnazııasynyń bıologııa pániniń oqytýshysy Alına Solovıova óz oıyn jetkizdi.

«Men qarapaıym mektep oqytýshysymyn. Men ata-analardyń bizden neni kútetinin bilemin. Kez kelgen ata-ana onyń balasyna túsinistikpen qarap, jaqsy kórgenimizdi qalaıdy. Qoǵam muǵalimderdiń esep berýmen aınalyspaı, balalarǵa durys mán bergenin jaqsy kóredi. Muǵalimderdi olımpıadada oryn alǵan oqýshylary úshin marapattaý jaıyna kelsek, "Daryn", NZM sııaqty daryndy balalar oqıtyn mektepterdiń bar ekenin eskere ketken jón. Al meniń jaı mekteptiń ózinde 143 jeńimpazym bar. Maqtanaıyn dep turǵan joqpyn, biraq osylardy dárejelerge bólý kerek sııaqty. Kimniń oqýshysy júıeli túrde jeńimpaz bolyp júrse, solardy marapattaý kerek», - dedi ol.

Baýyrjan Baıbek muǵalimniń usynysyn qoldady. Onyń aıtýy boıynsha, osy tektes mektepterdiń arasynda saralaýdy engizý qajet.

«Aýyldy jerlerde nemese jaǵdaıy tómen aýdandardan osyndaı jeńimpaz balalar az shyqpaıdy. Bul erekshe baǵalaýǵa turarlyq. Bul ustazdardyń zor eńbegi. Jaqynda ǵana astana ákimimen birge eki jyl buryn ǵana jekemenshik basqarýǵa berilgen №54 mektep-lıseıge bardyq. Olar dırektordyń kabınetin muǵalimder otyratyn bólme etip jasapty. Dırektor bolsa óz kabınetin birinshi qabattaǵy kireberiske jaqyn etip shynydan jasatypty. Biz Altaı Kólginov ekeýimiz barlyq memlekettik mektep dırektorlaryn osyndaı bastamaǵa shaqyratyn bolyp kelistik. Eger kim de kim osy ıdeıany qoldaıtyn bolsa, demek ózgerýge daıyn degen sóz. Keı mektep dırektorlarynyń eshteńe ózgertkisi kelmeı qashqaqtaıtyndary da qupııa emes. Ásirese, astanada, artynda tiregi bar dırektorlar. Eger ár dırektor áriptesterimen jumys isteı bilse, muǵalimderin qorǵasa, kómektesse, solar utady. Muǵalim mártebesi - bul bizdiń elimizdiń bolashaǵynyń máselesi, bizdiń básekege qabilettiligimiz», - dep atap ótti Baýyrjan Baıbek.