Bıznesti damytýǵa bankter de atsalysýda

Shaǵyn jáne orta kásipkerlik-memlekettik saıasattyń basty baǵyttarynyń biri. О́ıtkeni, bıznes damysa, eldiń de eńsesi tikteledi. Áleýmettik áleýeti artady. Sondyqtan da bolar, Memleket basshysy Qasym-Jomart Toqaev «Syndarly-qoǵamdyq dıalog – Qazaqstannyń turaqtylyǵy men órkendeýiniń kepili» atty halyqqa arnaǵan Joldaýynda osy máselege taǵy bir márte toqtalyp, Úkimet pen ákimderge naqty mindetter júktedi.

Búginde «Damý» kásipkerlikti damytý qorynyń aımaqtyq fılıaly «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda tyndyrymdy tirlikterge uıytqy bolýda. 2018 jyly «Eńbek» baǵdarlamasy boıynsha 1 mıllıard 232 mıllıon teńge bólinip, Damý Qory bul qarajatty ekinshi deńgeıli 6 bankke ornalastyrǵan bolatyn. Atap aıtqanda: «Sberbank» EB AQ – 385,6 mıllıon teńge, «Qazahstan Halyq Banki» AQ – 352,2 mıllıon teńge; «Forte Bank» AQ - 220 mıllıon teńge; «ATF Bank» AQ – 130 mln. teńge, «Bank SentrKredıt» AQ - 100 mıllıon teńge; «Evrazııalyq bank» AQ – 45 mıllıon teńge bólinip, ıgerilýde. Búginde, osy bólingen qarajat 99 paıyz ıgerildi. Nátıjesinde 109 joba nesıelendirildi. Sonyń ishinde Taraz qalasy boıynsha – 99, Qarataý qalasy boıynsha – 6, Jańatas qalasy boıynsha – 4 joba bar.

Al, aǵymdaǵy jyly osy baǵdarlamany iske asyrý úshin 1 mıllıard 036 mıllıon teńge bólindi. Búgingi kúni onyń 550,0 mln. teńgesi «Sberbank» EB, «Qazahstan Halyq Banki», «Forte Bank» aksıonerlik qoǵamdaryna ornalastyrylǵan. Qalǵan 486,6 mıllıon teńge qarjy somasy ıgerilýine qaraı ornalastyrylatyn bolady.

Osy baǵdarlamany iske asqannan beri oblysta jalpy mıkronesıe somasy 2 mıllıard 120 mıllıon teńgeni quraıtyn 189 joba qarjylandyryldy. Onyń ishinde Qordyń kepildigimen 77 joba, ıaǵnı bul rette olardyń jalpy nesıe somasy 825,1 mıllıon teńgeni, al Qordyń kepildiginiń jalpy somasy 425,7 mıllıon teńgeni qurap otyr.

Aǵymdaǵy jyldyń 6 aıynda jalpy nesıe somasy 791,5 mıllıon teńgeni quraıtyn 67 joba qarjylandyrylǵan. Onyń 19 jobasy «Damý» Qorynyń kepildigi kómegimen júzege asqan.

Bul baǵyttaǵy jumys aldaǵy ýaqytta da jalǵasa beretin bolady.