Shákirtterin qolónerge baýlyǵan

Sózge sheber, iske usta halqymyzdyń zor mádenıeti men ónerin pash etetin qundylyqtardyń biri – qolóner. Aǵashtan, temirden túıin túıgen, júnnen kóz jaýyn alatyndaı buıym jasaǵan. Sonymen qatar asyl tastardan sán buıymdaryn soqqan, súıek pen múıizdi, shıdi qıynynan qıystyrǵan halyq sheberleriniń isi maqtaýǵa turatyndaı óner týyndysy sanalady.

Qudiret Taýylbaev Jambyl oblysy Jýaly aýdanyndaǵy Báıterek aýylyndaǵy №2 Balalar óner mektebinde qolóner pániniń muǵalimi bolyp jumys istep, balalardy sándik qoldanbaly ónerge baýlýda. Ol kóbinese ulttyq aspaptyń túrlerin, er-tuman, astaý, ojaý jáne taǵy da basqa zattardy aǵashtan oıyp jasaıdy. Qolóner buıymdaryn jasaý úshin qaraǵash, baqaterek, jańǵaq aǵashtaryn paıdalanady.

Sheberdiń armany men maqsaty – qolóner buıymdaryn jasaýdy damytý, ony jastarǵa úıretý, shákirt tárbıeleý.

- Qazaq halqy salt-dástúrge, ádet-ǵurypqa jáne ónerge baı. Ata-babamyz qaldyrǵan altyn muralarymyzdyń astarynda úlken mán-maǵyna jatyr. Sonyń ishinde qolóner buıymdaryn jasaý adamdy shydamdylyqqa, sabyrlyqqa, tózimdilikke baýlıdy. Ár buıymdy jasaýdyń óz ereksheligi men qıyndyǵy bolady. Qolóner adamnyń jan dúnıesiniń tazalyǵyn qalaıdy, náziktikti talap etedi. Sonymen qatar, jasaǵan dúnıeń kózdiń jaýyn alatyndaı bolýy úshin uzaq eńbektenýiń kerek. Sebebi, sándik qoldanbaly buıymnyń aty atqandaı sáni men saltanaty kelisýi kerek, - deıdi Qudiret Jaqsylyqúly.

Bul óner Qudiretke ata-anasynan daryǵan eken. О́ziniń mamandyǵy basqa sala bola tura, buıym jasaýdy tańdaıdy. Ár eńbek izdenispen keledi. Bul rette ol óziniń izdenimpazdylyǵymen sheberliktiń qyr-syryn úırenedi.

-Meniń kóp ýaqytym balalarmen ótedi. Olarmen sabaq ótken óte qyzyqty. Oqýshylar kóp bilip, úırengisi keledi. Sol maqsatta olardyń tarapynan qoıylǵan suraqtarǵa jalyqpaı jaýap beremin. О́nerdiń shegine jetip bolmaısyń. Biz ata-babamyzdan qalǵan muralardy jastarǵa úıretip, onyń joǵalyp ketpeýine atsalysýymyz kerek. Álbette, aýylda nebir týma talantty jandar bar. Mine, sondaı azamattar barda tól ónerimiz mánin de, maǵynasyn da joǵaltpaıdy, - deıdi sheber.

Naǵyz sheberdiń jan júregimen jasylǵan dúnıesi eshqashan jerde qalmaıdy. Ol máńgilik mura bolyp saqtalatyny barshamyzǵa belgili. Al ustanyń ónerin jalǵastyrýshysy, keler urpaqqa taratýshysy da onyń shákirtteri bolatyny aıdan anyq. Osy oraıda jas sheberdiń artynan ergen oqýshylary Medet Qarymtaev, Imanǵalı Ibragım, Arabhan Alaıdarov taǵy da basqa oqýshylar óner mektebinde qolóner synybynan qalmaı, ustazdarynyń úıretkenderin kóńilderine toqýda.