"Erlik.kz" saıtynyń salmaǵy bólek

Tarıhy tereń Taraz qalasynda sońǵy jyldary tarıhı-mádenı keshender, skverler, parkter ashylyp, qala turǵyndary men qonaqtary bir mezgil serýendeıtin oryndar boı kóterýde. Sonyń biri – ótkenge oı júgirtip, batyr babalarymyz jaıly urpaq aldynda ónege aıtýǵa múmkindik jasalǵan «Erlik» memorıaldyq kesheni. Bul tarıhı keshende Jambyl oblysynan Uly Otan soǵysyna attanǵan, qaıta oralǵan, belgisiz ketken jáne Keńes Odaǵynyń Batyrlary, taǵy basqa da tulǵalardyń esimderi tasqa qashalyp, máńgi tarıhta qaldyrý kózdelgen bolatyn.

Jambyl oblysy ákimdiginiń mádenıet, arhıvter jáne qujattama basqarmasy basshysynyń orynbasary Sara Mádıevanyń aıtýynsha, keshende ornalasqan kolonnalardaǵy azamattar tiziminiń barlyǵy derlik oblystyq, qalalyq, aýdandyq áskerı komısarıattardyń álipbılik tirkeý kitap-jýrnaldarynan alynyp jınaqtalǵan.

Bul tizimdi túgendeýdi basqarma basshylyǵy, oblystyq, qalalyq, aýdandyq arhıv mekemesiniń dırektorlary men qyzmetkerleri atqaryp shyqqandyǵyn da aıta ketken jón.

Atalǵan ıgi shara áli de jalǵasyn taýyp, «Erlik.kz» arnaıy saıty ashyldy. Saıtqa oblys boıynsha jınaqtalǵan 106 000 azamattardyń tizimi elektrondy nusqada engizilgen. Kez-kelgen oqyrman áleýmettik jelide ornalasqan saıtqa kirý arqyly kóptegen málimetter ala alady.

Basty bette Keńes Odaǵynyń Batyrlary, jambyldyq maıdangerler, otty jyldardyń tarıhy jáne galerııa ornalastyrylǵan. Sonymen birge, usynys-pikirler qaldyrý maqsatynda baılanys telefondar men meken-jaıy týraly da aqpar bar. Saıt qolda bar jańa málimettermen tolyqtyrylyp, jańartylyp otyrady.

-Sonymen qatar qalalyq, aýdandyq ákimdikter jumyspen qamtý jáne áleýmettik baǵdarlamalar bóliminen qazirgi tańdaǵy kózi tiri ardagerlermen kezdesip, áńgime-suhbat, foto, vıdeo, estelikteri jınaqtaldy.

Jınaqtalǵan málimetter negizinde «Jeńis sarbazdary» atty aıdar ashylyp, ardager qarııalardyń estelik áńgimeleri, otbasy, qujattary, medaldary, kýálikteri jáne basqa da málimetteri engizildi. Osylaısha, Jeńisti jaqyndatqan jerlesterimizdi tarıhta máńgi qaldyrýǵa óz úlesimizdi qosýdy maqsat tutyp otyrmyz.

Búgingi kózi tiri ardagerlerimizdiń barlyǵynyń jasy 90-nan asqan. Jasy kelse de kóshten qalmaǵan kósheli jandardy, ádette, súıegi asyl dep áspetteımiz. Mahmýd esimdi qarııa da qazirge deıin túrli merekelik sharalardan qalmaı, omyraýy orden, medaldarǵa toly kostıýmin kıip baryp, jastarǵa óz basynan ótkergen ómir sabaqtarynan ónegeli áńgime shertip qaıtady. Osyndaı júris-turysy shıraq, sóz saptaýy ornyqty qarııalarymyz bıylǵy Jeńis paradynda da sapta júrýge qaýqary baryna kózimiz jetti,-deıdi Jambyl oblysy ákimdiginiń mádenıet, arhıvter jáne qujattama basqarmasy basshysynyń orynbasary Sara Mádıeva.

Surapyl soǵystyń nebir qıyn sátterin esine alǵan qarııalardyń estelikterin estigende kózińizge eriksiz jas keledi. Rasynda da bul kisiler qandaı da bolsa qurmetke ábden laıyq. Osy oraıda qazirgi jahandaný zamanynda áleýmettik jeli arqyly batyr babalarymyzdyń erlikterin pash etýge de mol múmkindik týyp otyr.

Soǵys jyldary oq pen ottyń arasynda qan keshken maıdangerlerdiń erligi eshqashan umytylmaıdy.