Qurylys nysandary kez kelgen jerge salyna bermeıdi

Jambyl oblysy aýmaǵynda avtomobıl joldary men aýdan ortalyǵynyń bas kóshelerinde ornalasqan qurylys nysandary men saýda oryndaryn talapqa saı etý boıynsha birqatar jumystar qolǵa alyndy. Olardyń keıbirine buzý túrinde shara qoldanylysa endi keıbiriniń qasbeti retke keltirilgen. Qalǵandarynyń ornalasý zańdylyqtary oblys ákimdiginiń memlekettik sáýlet-qurylys baqylaý basqarmasynyń mamandarymen anyqtalatyn bolady, dep jazady Qamshy.kz aqparat agenttigi. 

Oblys ákimdiginiń sáýlet jáne qala qurylysy basqarmasy basshynyń mindetin atqarýshy Dáýlet Dosanvtyń aıtýynsha óńirdegi avtomobıl joldarynyń boıynda, aýdan ortalyqtarynyń bas kóshelerinde ornalasqan qurylys nysandary men saýda oryndaryna zań talaptaryna saı shara qoldanylyp jatyr eken.

–Oblys aýmaǵynda mundaı 109 nysannyń bar ekendigi anyqtaldy. Onyń 58-i tıisti qujattaryn rásimdep alǵan. Al qalǵany 51 nysannyń eshqandaı qujattary rásimdelmegen. Osyndaǵy 29 nysanǵa ártúrli deńgeıde shara qoldanyldy. Atap aıtqanda 18 nysanǵa qatysty ornynan alý, buzý týraly sheshim shyǵaryldy. Taǵy 7 nysanǵa shara qoldanýdy oblys ákimdiginiń memlekettik sáýlet-qurylys baqylaý basqarmasy sheshetin bolady. Al jol boıynda, aýdan ortalyǵyndaǵy negizgi kóshelerde qurylys júrgizgen, saýda oryndaryn qoıǵan 2 tulǵaǵa aıyppul salyndy. Qalǵan 2 nysannyń syrtqy qasbeti retke keltirildi, – deıdi.

Negizinen kásipkerlik jáne ózgede maqsattaǵy nysandardyń avtomobıl joldary men aýdan ortalyǵyndaǵy negizgi kóshelerdiń boıynda salynýynyń óz zańdylyǵy bar. Ári bul zańdylyq eldi mekenderdiń bas jospary men ońaılatylǵan syzbaǵa ıek artady. Qazir oblys aýmaǵynda 377 eldi meken bolsa onyń 330-y ońaılatylǵan syzbamen qamtamasyz etilgen. Al 362 eldi meken bas jospar jáne ońaılatylǵan syzbalarmen qamtamasyz etiledi. Aıta ketý kerek bul qujattar eldi mekenderdegi halyq sanyna qaraı jasaldy. Búginde oblys aýmaǵyndaǵy 28 eldi mekendegi turǵyndar sany 5 myńnan asady. Sondaı-aq óńirdegi turǵyndarynyń sany 50-ge jetpeıtin de eldi mekender bar. О́z kezeginde bul faktorlardyń barlyǵy olardyń bas josparyn daıarlaýda áser etedi. Bas josparlarda tek eldi mekenniń sáýlettik kelbeti ǵana kórinis tappaıdy. Munda ólke turǵyndarynyń ómir súrýine qolaıly orta jasaýdyń múmkindikteri de zerdelenedi.