Jemqorlyqqa jumyla soqqy jasaǵan jón

Jemqorlyq – indet, joıý –mindet. Búginde bul qaǵıdat táýelsiz memleketimizdiń basty uranyna aınaldy. Alaıda sybaılas jemqorlyqqa qansha qarsy tosqaýyl qoısaqta, túp tamyryna balta túspeýde. Tipti jeń ushynan jalǵasqan jemqorlyq eń jaýapty salalardyń da tamyryna batyp otyr, dep jazady Qamshy.kz aqparat agenttigi. Rasynda qazirgi tańda jemqorlyq degen indettiń dendep kirmegen jeri qalmady. Bul kesel Jambyl oblystyq Tótenshe jaǵdaılar salasyn da aınalyp ótpeı, jyl ishinde Merki aýdanynda bir maman quryqtaldy. Adam ómirine jaýapty sala buǵan qalaı jol berip qoıdy? Bul saýalǵa jaýap tabý úshin oblystyq Tótenshe jaǵdaılar departamenti bastyǵy Baǵdat Danılovty tilge tartqan edik.

- Jemqorlyq degen qazirgi tańda eń úlken kesel bolyp turǵany aqıqat. Buǵan Memleket basshysy Qasym-Jomart Toqaevtyń ózi jumyla soqqy jasaýǵa shaqyrýda. Ras, departamentke qarasty Merki aýdanyndaǵy bólimimizde para alý faktisi boıynsha bir oqıǵa tirkeldi. Bul búkil qurylym úshin tańba bolǵany daýsyz. Jáne bárimizge aýyr soqty. Atalǵan derek boıynsha ustalǵan maman jumystan bosatylyp, onyń tikeleı basshysy qyzmetinen tómendetildi. Sondaı-aq sala mamandarymen tolyqtaı túsindirme jumystary júrgizildi. Odan bólek, qazir dúısenbi saıyn saǵat 17.00-de elimizdiń Ishki ister mınıstri Erlan Turǵumbaevtyń qatysýymen selektorlyq rejımde keńes ótedi. Osy jıynda apta ishinde bolǵan oqıǵalar zerdelenip, áleýmettik jeliler men basylymdarǵa shyqqan maqalar men vıdeolarǵa qatysty árqaısymyzdan jeke-jeke túsinikteme alynady. Sonymen qatar jemqorlyq faktileri boıynsha da jaýap beremiz. Bir sózben aıtqanda qazir sybaılas jemqorlyq jaıttary mınıstrlikten bastap, óńirlik departamentterdiń jiti baqylaýynda tur, - deıdi Baǵdat Jumauly.

Árıne baıybyna barmaı baıbalam salýdan aýlaqpyz. Alaıda jemqorlyq qurty qutqarýshylar syndy qurylymnyń óziniń súıegine túsip, qanyn qoıýlandyryp jatqany oılandyrady. Bir qyrynan Baǵdat Jumaulynyń sózin orynsyz deı almaspyz. Sebebi departament basshysynyń ózi tikeleı uıytqy bolyp, búginde Baızaq aýdanynda jemqorlyqqa qarsy túrli jıyndar ótkizgenin kóz kórdi. Sondaı-aq Taraz qalasyndaǵy Jeńis saıabaǵynda «Jolda qabyldaý» sharasyn uıymdastyryp, turǵyndardy oılandyrǵan san saýalǵa tikeleı jaýap berdi. Bul departament bastyǵynyń ashyqtyq prınsıpin ustanatynyn aıǵaqtaıdy. Sol sebepti Merki aýdanyndaǵy keleńsiz bir kórinis salada sońǵy sybaılastyq faktisi bolady dep senemiz.