Muhamedjan Tazabek: Meni mazaq qylǵandarǵa mazmundy ómir bersin...

Basyn aıaǵyna, aıaǵyn basyna japsyryp, bir sóılemdi ekige bólip turyp montajdap, aıryqsha maıtalmandyq tanytqan ekensizder...Sonshama kezdesýde, munshama "qatygez, el buzarlyq, eki júzdi" sózder aıtqan bolsam, kózbe-kóz estip otyrǵan birde-bir tyńdarmannyń áleýmettik jelide qarsy pikir bildirmegeni qalaı?

Kerisinshe júzdesýden ulttyq rýhy qaıralyp, rızashylyqtan aq batasyn jaýdyrǵan myńdaǵan aǵaıynnyń aq tilegi aldamshy alǵystar ma edi?!

Aqyry sizderde tolyq vıdeo bar bolsa, ata men ájeniń, ana men balanyń qadyr-qasıetin aıtyp, pagondylardyń keıbiri kózine jas alǵanyn nege kórsetpedińizder?

Qataıǵan júrekter men turpaıy minezderdiń aıyptalǵanyn, "birinshi kezekte tártip pen talapty ózderińen bastaý kerek" degenimdi nege kesip tastadyńyzdar eken?

"Búlik kisi óltirgennen jaman, ol qaterli jol" onyń qaterliligi jaıly "álemniń barlyq ǵalymdary kelisken, pátýa bergen" dep aıtqanymdy nege ajyrattyńyzdar. Sońǵy sózdi Mekkedegi jambastan tebetin polısııa jaıly áńgimeniń artyna nege japsyrdyńyzdar?

Qytaıdyń álem qaýiptenip otyrǵan tustary men odan aman qalýdyń joldary jaıly aıtqan jarty saǵattyq tolǵanysymdy nege tolyq bermedińizder?

"Qytaıdan qoryqpaıyq, Qudaıdan qorqaıyq" degen alǵashqy sóılemdi ǵana nege oıyp aldyńyzdar?

Endi osy rolıkti jasaǵan nemese sol jıyndarǵa qatysqan tyńdarmandaryma bir shúıinshi-ótinishim bar.

Kezdesýler kásibı kameraǵa túsirilgen eken. Onyń ústine árkimniń qaltasynda smartfondar júr ǵoı. Eshbir jerde eshkimge túsirýge tıym salǵam joq.

Quqyq qorǵaýshylarǵa qarata, "halyqty aıamańdar, uryńdar, soǵyńdar, olar búlikshiler, aıaǵyn syndyryńdar, ata-ájeni julmalańdar, áıelder men bala-shaǵany shyńǵyrtyńdar" degen 2 mınýttyq, tym bolmasa montajdalmaǵan 1 mınýttyq vıdeony jurtqa jarııalańyzdarshy. Bolmasa, qytaıdy jaqtaǵan, onyń dańqyn aspandatqan 2 mınýttyq montajdalmaǵan vıdeony maǵan taýyp berińizdershi. Taýyp bergen kisige astymdaǵy atymdy túsip berýge daıynmyn...

Al,endi, shetelde júrip, eldi alańǵa shaqyryp, jurtqa ótirikti shyndaı, shyndy qudaı urǵandaı ǵyp jetkizip, arandatýmen aınalysyp júrgen jerlesimiz jaıly aıtqanym aıtqan. Eldegi kemshilikterdi ol aıtpasa da bilemiz. Bilgendikten sapamyzdy arttyryp, synǵandy bútindeý úshin kúndiz-tún shapqylap júrmiz.

Alańǵa shyǵý da qazaqtyń qoly emes. Eýropalyqtardaı alańǵa 4 te kep, 6 da qaıtyp ketetin qazaqty ázir kórgem joq. Shaqyrǵan toıdyń ózine keshigip baryp, úı ıesiniń uıqysy kelgende biraq qaıtatyn qaýymbyz. Sháıdan soń soń sháı ishetinimiz taǵy bar. Sherý - bizdiń mentalıtetke shetin. Qazaqtan alańdy qyzǵanbaımyn. Arandap qalamyz ba, dep alańdaımyn. Bále aıaq astynda. Nıetińiz beıbit sherý shyǵar... 

"Jetiskennen shyǵam ba" dersiz...Emosıonaldy ortaǵa kelgesin eshkimge garantııa joq. Ot jaǵý op ońaı. Damyǵan elderge máselesin alańǵa emes, bireýdiń eline baryp sheshse de "jarasady". Otardan shyqqan elderge alańǵa baryp, másele sheshpek túgili, úıinde otyryp, shúıirkelesýdiń ózi ońaı bop jatqan joq. Ajyrasyp jatqan úsh otbasynyń bireýi soǵan dálel.

Al, Elbasy jaıly aıtqanym ras. О́z aǵasyn aǵalamaǵan, kisi aǵasyn jaǵalaıdy. Sizge unaı ma, unamaı ma, ol bizdiń Elbasy! Ol kisiniń eren eńbegin eshkim tarıhtan syzyp tastaı almaıdy. Prezıdent degen perishte emes. О́zińdi orynyńa qoıyp kórseń, oılaýǵa da qorqatyn taǵdyrdyń ıesi. Qıyn kezde el basqardy. "Hannyń syryn qul bilmeıdi, quldyń syryn kim bilmeıdi". Zaman aýysady. Talaı jaqsylyq janymyzdy qýantar, áli. Toqaev prezıdent bolǵaly da qanshama úmitter eselenip, kóńilder kóriktendi. Qazir janashyrlyqty jaǵympazdyq, betpaqtyqty batyrlyq, dep qaraıtyn kezeńdemiz. Estigenge senbeńiz, artyn tekserińiz. Kórgenge senbeńiz, sebebin bilińiz. Bireý kóre almaıdy, bireý bále izdeıdi. Biz jaıly Abaıdan artyq aıtqan adam joq. "Birińdi qazaq biriń dos, kórmeseń istiń bári bos!"

Kesheli-beri ınternetti ıyǵynan demalttyq. Túsinbeı jek kórgennen qolymda ólgisi kep, jaqsy kórgennen jolymda ólgisi kep jatqan qazaq ta kóp. Qapersizdikpen qarǵys aıtyp jatqan da, túbin túsinip alǵys aıtyp jatqan da ózimniń qazaǵym. Eshkimge renishim joq. Aýylda týdyq, el tárbıeledi, halyq qoldady, kóptiń qamynda júrmiz...

Búgin estip otyrǵan jalam emes, erteń toqtap qalatyn synaq emes... О́mirdiń ózegi- sabyr men salqynqandylyq!

Tabalaǵandarǵa Alla taýpıh bersin, mazaq qylǵandarǵa mazmundy ómir bersin, burmalaǵandarǵa bir Qudaı hıdaıat bersin!

Muhamedjan Tazabektiń paraqshasynan alynǵan.