Jambylda álem chempıonymen kezdesý ótti

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Túımekent aýyldyq okrýgi ákimshiliginiń uıymdastyrýymen erejesiz jekpe-jekten álemniń úsh dúrkin chempıony Ardaq Nazarovpen kezdesý ótti.

Tárbıelik mánge toly basqosýǵa aýdan ákimdiginiń ishki saıasat bólimi men aýdandyq jastar resýrstyq ortalyǵynyń mamandary, Túımekent orta mektebi men Ǵazız Baıtasov atyndaǵy tirek mektebiniń ustazdary, oqýshylary, jas sportshylar jáne jergilikti buqaralyq aqparat quraldarynyń ókilderi qatysty.

Ardaq Nazarov – sharshy alańda júzge jýyq kezdesý ótkizip, onyń basym kópshiliginde qarsylastaryn tize búktirgen beıbit kúnniń batyr uly. О́zin tek sporttyq jaǵynan emes, tarıh pen ádebıet salasynan da biliktiligin kórsetip, jastardy ultjandyqqa tárbıelep júrgen sportshy. Túımekent aýylyndaǵy jas urpaqtyń salaýatty ómir saltyn ustanýymen qatar, ata-anany qurmetteý, ımandylyq, izettilik, adamgershilik sekildi qundylyqtardy boılaryna sińirý maqsatyn kózdegen jıynnyń bastapqy sózin Túımekent aýyldyq okrýginiń ákimi Qanat Smaǵulov ashty. О́z sózinde Qanat Erýbaıuly uıymdastyrylyp otyrǵan atalmysh júzdesýdiń mańyzdylyǵyna toqtaldy.

Kezdesý barysynda sańlaq sportshy jastarmen otbasy qundylyǵy jáne birlik pen yntymaq taqyrybynda oı bólisti. Kishi býyn ókilderin jigerlendirip, namystaryn qaıraıtyn sózder aıtyp, olardy ultjandylyqqa, otansúıgishtikke shaqyrdy.

Sondaı-aq, chempıon jastarǵa tarıhta ótken batyr babalarymyzdyń erlikterin baıan etip, táýelsizdiktiń qandaı qıynshylyqpen kelgenine toqtaldy. Kıeli dalany meken etken kóshpeli babalardyń jaýyngerlik erlikteri týraly tarıhı qıssalardy jastarǵa sheber jetkizip, sol batyrlardyń jeke-jeke esimderin eske aldy.

Búginde álem moıyndaǵan chempıon – kópke úlgi. О́skeleń urpaqqa salıqaly sózder aıtyp, oramdy oı bildirip júr. Alashtyń namysty azamaty Ardaq Nazarov baızaqtyq jastarǵa er jigitterge qandaı qasıetter tán bolý kerektigin aıtyp, jastardy óz eliniń patrıoty bolýǵa shaqyrdy. «Alla taǵala berip te synaıdy, alyp ta synaıdy. Dúnıe búgin bar, erteń joq. Biraq, adamzatty sulýlyqpen, mansappen, baılyqpen, dúnıemen ólsheýge bolmaıdy. Adamzattyń ólshemi - onyń rýhanııatynda, onyń tektiliginde, márttiginde, adamı qundylyǵynda», - dep qorytyndylady ol sózin.

Kezdesý sońynda aýyl aqsaqaldary el namysyn álemdik arenada qorǵap júrgen sańlaq sportshyǵa alǵystaryn aıtyp, batalaryn berdi.