Balasyna ekpe saldyrmaǵan ata-analarǵa aıyppul salynady

Qazaqstanda balalaryna ekpe saldyrýdan bas tartqan ata-analar jazalanýy múmkin dep jazady Qamshy.kz aqparat agenttigi sputniknews.kz saıtyna silteme jasap. 

Biraq balalarǵa qajetti em kórsetiletin bolady, dep densaýlyq saqtaý mınıstrligi jańa zańnyń normasyn túsindirdi.

"Zań jobasynda balalarynyń ekpe saldyrý quqyǵyn buzǵan ata-analarǵa qatysty aıyppul sanksııalaryn engizý týraly usynystar bar. Joba áli ázirlenip jatyr, oǵan usynystar enetin bolady", - delingen habarlamada.

Balasyna ekpe saldyrmaǵandarǵa aıyppul salynady.

Densaýlyq saqtaý mınıstrligi atap ótkendeı, balaǵa ekpe salynbaı, sonyń saldarynan aýrýǵa shaldyqsa, tegin medısınalyq kómek kórsetiledi.

"Aıyppul ata-analardyń bárine birdeı salynbaıdy. Biraq ekpeden bas tartý saldarynan aýyrǵan balalardyń emin memleket tóleıdi. Osyndaı jaǵdaıda ǵana aıyppul salynýy múmkin. Ekpe saldyrmaǵan bala aýyrmasa, ata-anasy jazalanbaıdy", - dep málimet berdi vedomstvo.

Buǵan deıin densaýlyq saqtaý mınıstrliginiń taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasy Lıýdmıla Bıýrabekova habarlaǵandaı, Qazaqstanda ekpe salynbaǵan balalardy ata-analardyń esebinen emdeýdi qarastyratyn norma engizilýi múmkin.

Densaýlyq saqtaý mınıstrliginiń málimetinshe, bıyl alty myńdaı ekpeden bas tartý jaǵdaıy tirkelgen. Barlyq ata-anamen jeke-jeke jumys júrgizilip jatyr.

Vedomstvo ekpeden bas tartý sebepterin de atap ótti: shamamen 50%-i – jeke uǵymy boıynsha (Almaty, Nur-Sultan, ShQO), 35%-i – dinı nanym-senimine baılanysty (Mańǵystaý, Atyraý, Aqtóbe) jáne 15%-i ekpeniń sapasynan kúdiktenedi, sondaı-aq BAQ-taǵy jaǵymsyz jańalyqtar men ekpeniń saldarynan qorqady eken.