Atyraýlyq úkimettik emes uıym ókilderi qatysqan "AqJaıyqCamp 2019" trenıngi ótti

Semınar-trenıngtiń maqsaty – túrli baǵytta belsendi áreket etetin úkimettik emes uıymdardyń áleýmettik baǵyttaǵy jumystar men qarjylyq saýattylyqtaryn arttyrý, tyń ıdeıalarynyń júzege asýyna járdemdesý, fandraızıng (jobaǵa qarjy kózderin tartý) baǵyty boıynsha tájirıbe almasý.

Bul sharaǵa qatysý úshin atyraýlyq úkimet emes uıym ókilderi saıtqa ótinim qaldyrdy. 75 ÚEU ótinish tapsyryp, konkýrs erejesine sáıkes komıssııalyq irikteýden ótken 40 úkimettik emes uıym ókili osy sharaǵa  qatysty.

Atyraý qalasynan Oral qalasyna jetý úshin qatysýshylar arnaıy avtobýspen bardy. Uıymdastyrýshylar Oral qalasyna jetken soń qatysýshylardyń tabıǵat aıasynda áserli tanysý keshin uıymdastyrdy.

Azamattyq ortalyqtyń dırektory Áıgerim Dosqalıeva sharanyń maqsaty týraly aıtyp ótti.

Áıgerim Dosqalıeva, Azamattyq ortalyqtyń dırektory:

Qatysýǵa 70-ten astam ÚEU ótinish bildirip, sodan talaptardy tolyq oryndaǵan 40 uıym kúzgi lagerge joldama aldy. Iаǵnı, bizde arnaıy 10 suraqtan quralǵan saýalnamany toltyrý kerek boldy. Onda kúzgi lagerge qatysý maqsaty, qandaı jobalyq ıdeıasy bar, ózińniń ÚEU-dy bes jyldan soń qalaı elestetesiń degen suraqtar boldy. Kelgen saýalnamalarǵa bizdiń áriptester jáne Atyraý oblysy ishki saıasat basqarmasy basshylyǵy irikteý jasap, baǵalaý júrgizdi.

Alǵashqy kúni qatysýshylar sharanyń ashylýyna qatysty. Budan soń Novosibir qalasyndaǵy «Solnechnyı gorod» balalarǵa arnalǵan qaıyrymdylyq qorynyń fandraızeri, 285 mln rýbl kóleminde qorǵa qarjy tartqan Stýla Zemfıra men «Dobryı gorod – Peterbýrg» qaıyrymdylyq qorynyń úılestirýshisi «Jańadan bastaýshylarǵa arnalǵan fandraızıng» jáne «ÚEU qyzmetine qarajat izdeý: syrtqy jáne ishki resýrstar» taqyrybynda semınar-trenıng ótkizdi. Túrli oıyndar arqyly kórsetilgen trenıngte ÚEU ókilderi óz salalaryna baılanysty túrli suraqqa jaýap aldy.

Qatysýshylarǵa semınar-trenıng ótkizgen trener Iаna Zýbko shara týraly óz pikirin bildirdi.

Iаna ZÝBKO, «Dobryı gorod – Peterbýrg» QQ úılestirýshisi:

Semınar-trenıngke qatysýshylar sabaqty jaqsy qabyldady. Bul taqyrypta aıtatyn aqparat óte kóp. Bir kúnde barlyǵyn qamtý múmkin emes. Sol sebepti de bir kúnde kóp aqparatty jetkizý jáne qabyldaý qıyn bolýy múmkin. Biraq, qıyndyq bolmasa úlken jetistikke jetý de damý da bolmaıdy dep oılaımyn.

Semınar-trenıngten soń qatysýshylar keshkisin komandalyq oıyndar oınap, sońy kóńildi keshke ulasty.

Sharanyń ekinshi kúni atyraýlyq ÚEU ókilderi Ulybrıtanııadaǵy Fandraızıng ınstıtýtynyń múshesi, qazaqstandyq fandraızer Indıra Shahtyń «Jobalyq ótinim degen ne? Jobanyń nátıjesi men tıimdiligi qandaı?» taqyrybynda semınar-trenıngine qatysty. Árbir qatysýshy óziniń qazirgi bastaǵan nemese oıynda júrgen jobalyq ıdeıalaryn trenermen aqyldasa otyryp, maqsaty men nátıjesin birge talqylady. Komandaǵa bólingen qatysýshylar ózara jarysa otyryp, jaqsy jobalyq ótinimniń tıimdiligi men maqsatyn túsinip shyqty.

Eki kúndik sharadan soń qatysýshylar óziniń áserimen bólisti.

Meıirim Erdáýlet, «Talshyn» qoǵamdyq qorynyń jetekshisi:

Jaqsy demalys pen keremet lager barlyǵyn birge uıymdastyrǵan Azamattyq ortalyqqa kóp raqmet! 40 uıym men bilgir trenerlerdiń tálimi,  qonaqjaılylyq pen jyly qabyldaý, jańa ıdeıalar men kókeıde júrgen maqsattardy júzege asyrýǵa degen úlken múmkindik, komandalyq uıymshyldyq jáne ıgi istiń qashanda basynda júrýdiń qyr-syryn sanamyzǵa quıǵan lager úshin raqmet saǵan, Azamattyq ortalyq!

Aqylbek Muhanov, «Igi iske bastama» qoǵamdyq birlestiginiń jetekshisi:

Áriptesterime kóp rahmet aıtamyn! Osyndaı paıdaly trenıngter kóp bolsyn! Bizdiń baǵytymyz ár qıly bolǵanymen, maqsatymyz – bir. Bir-birimizdi árkez qolpashtap júre bereıik!

Elvıra Aralova, «Samǵa, júregim» qoǵamdyq qorynyń jetekshisi:

Kóńildi atmosfera, jaıly ortada bilimimzdi arttyrǵan keremet shara boldy. Qazaqta «bilgenim – bir toǵyz, bilmegenim – toqsan toǵyz» degen sóz ras. Jobany qalaı jazý kerek, qarjyny qalaı tartýǵa bolady jáne t.b. oıymdaǵy kóptegen suraqqa jaýap aldym. Qatysýshylar da ózderiniń tájirıbelerimen bólisti. Bárimiz bir salada júrgennen soń bul paıdasyn tıgizedi dep oılaımyn. "Aqjaıyq CAMP" atty lager uıymdastyrǵan azamattyq ortalyqqa úlken alǵys bildiremin. Osyndaı sharalar kóp bolyp, Atyraýlyq ÚEU-dyń belsendiligi arta bergeı!

Qaıdarbek Qurmashev, «Aqjol Mahambet» múgedekter qoǵamdyq birlestigi:

Bilý, úırený qaı jasta da uıat emes dep oılaımyn. Al mynadaı kóńildi ortamen bilimińdi arttyrý tipten keremet! Biz bir dúnıege jan-jaqty kózqaraspen qaraýymyz kerek. Áli de úırenerimiz kóp. О́zim árkez izdeniste júrgendi jaqsy kóremin. Osyndaı sharalar jıi uıymdastyryla berse, qatysýdan qashpas edim. Men úshin qajetti dúnıeler aıtyldy. Azamattyq ortalyq ujymyna alǵysym sheksiz.

Semınar-trenıng bitken soń Azamattyq ortalyq ujymy qatysýshylardy Oral qalasynyń kórikti jerlerine aralatty. Shara sońynda qorytyndy kesh uıymdastyrylyp, árbir qatysýshyǵa Azamattyq ortalyqtyń dırektory Ámına Járdemqyzy sertıfıkat tabystady.

Aıta keteıik, fandraızıng – óz baǵdarlamalaryn iske asyrý jáne maqsattaryna qol jetkizý úshin qajetti resýrstar alýǵa baǵyttalǵan qyzmet.