El ıgiligi úshin merekelik tartý

Elbasy Nursultan Nazarbaev óziniń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Medısınalyq qyzmet sapasy halyqtyń áleýmettik kóńil-kúıiniń asa mańyzdy komponenti bolyp sanalady. Eń aldymen, ásirese aýyldyq jerlerde alǵashqy medısınalyq-sanıtarlyq kómektiń qoljetimdi bolýyn qamtamasyz etý qajet» dep aıryqsha tapsyrǵan bolatyn. Búginde óńirdegi shalǵaı aýdandarda densaýlyq saqtaý salasynyń qyzmet sapasy jyl sanap artyp keledi. Bul mańyzdy baǵyt boıynsha atqarylyp jatqan jumys ta, aldaǵy josparlar da aýqymdy. Dál Qazaqstan Respýblıkasynyń Konstıtýsııasy kúni qarsańynda taǵy 36 arnaıy medısınalyq jedel járdem kólikteri aýdan halqynyń ıgiligi úshin berildi. Al oblys ortalyǵynyń turǵyndary úshin 58 sý jańa qoǵamdyq kóliktiń kilti saltanatty túrde qaladaǵy jolaýshy tasymaldaıtyn mekemelerde tabystaldy.

Árıne, aıbyndy Ata zańymyzdyń ózinde eń basty qundylyq adam ómiri ekeni belgili. Búgingideı jahandaný men jańǵyrý ǵasyrynda básekege deni saý ult pen urpaq qana tótep berip, tolaǵaılarmen taıtalasa alatyny aıtpasaq ta túsinikti. Elimiz táýelsizdik alǵaly beri Ult Kóshbasshysy Nursultan Ábishuly óziniń halyqqa arnaǵan árbir Joldaýynda buqaranyń densaýlyǵyn basty nazarda ustap, kún tártibinen túsirgen emes. Onyń ıgiligine el kýá. Osy tusta Qazaqstan Respýblıkasy Kostıtýsııasy kúni qarsańynda ortalyq «Dostyq» alańynda taǵy 36 arnaıy jedel járdem kóligi halyqtyń saýlyǵy úshin paıdalanýǵa berildi. Jáne ol sý jańa júıitkigen avtokólikterdiń 3-i Jambyl aýdanynyń, 3-i Jýaly, 11-i Qordaı, 2-i Merki, 2-i Moıynqum, 9-y T.Rysqulov, 3-i Shý, 2-i Sarysý, 1-i Talas aýdanyndaǵy medısına salasy maıtalman mamandarynyń enshisine úlestirildi. Aıta ketsek, oblys ortalyǵyndaǵy jedel járdem stansııasynda 2014 jyly 56 sanıtarlyq avtokólik bolǵan, sol jyly oblystyq bıýdjet esebinen 4 kólik alynyp, barlyǵy 60 avtokólikti quraǵan. Al 2018 jyldyń 1 shildesinen bastap, jedel járdem qyzmeti ortalyqtandyrylyp, Jambyl oblystyq jedel járdem stansııasy bolyp ózgertildi. Sondaı-aq 2018 jyly 253,0 mıllıon teńgege 27 birlik avtokólik satyp alynǵan. Merekelik tartý munymen shektelgen joq. Qalalyq jolaýshylar tasymaldaıtyn «Áýlıeata TransPass» JShS 33 birlik, «Taraz TransMotors» JShS 15 birlik, al «Sapar Trans-2012» JShS 10 birlik jańa avtobýstarmen tolyqty. Jalpy sany 58 qoǵamdyq kólik Damý baǵdarlamasy «Jol kartasy» aıasynda satyp alynypty. Saltanatty sharaǵa arnaıy qatysqan oblys ákiminiń orynbasary Erkebulan Daýylbaev sóz tizgindep, jınalǵandardy Konstıtýsııa kúni merekesimen quttyqtap, halyqtyń ıgiligi úshin aıanbaı eńbek etip júrgen sala mamandarynyń ilkimdi isterine tabys tilep, avtokólikterdiń kiltip tapsyrdy. Shara barysynda medısına salasynyń ardageri, taraz qalasy men Baızaq aýdanynyń Qurmetti azamaty Samıha Qońyrova izgi lebizin jetkizip, áriptesteriniń atynan alǵysyn jetkizdi. «Aýdan halqy jáne biz, medısına mamandary úshin bulúlken kómek, zor qamqorlyq, tamasha tartý. Kóp jaǵdaıda shalǵaıdaǵy naýqastarǵa der kezinde jete almaý sekildi transporttyq máseleniń kezigetini ras. Degenmen Elbasynyń sarabdal saıasatynyń, Prezıdentimizdiń paıymdy pármeniniń arqasynda bul másele de kezeń-kezeńimen sheshimin taýyp keledi. Bizdiń kásibı jáne azamattyq mindetimiz – qaltqysyz qyzmet etip halyq deniniń saýlyǵyn qamtamasyz etý. Sondyqtan aıtýly merekeniń qarsańynda qýanyshymyzdy eseleı túsken oblys basshylyǵyna alǵystan basqa aıtarymyz joq» deıdi Qordaı aýdandyq ortalyq aýrýhanasy bas dárigeriniń mindetin atqarýshy Gúlnara Satybaldına. Saltanatty shara sońy merekelik án shashýmen qorytylandy.