Nurlan Noǵaev: Tek eńbekqorlyqtyń arqasynda ǵana adam tabysqa qol jetkizedi

27 tamyzda Atyraýda Atyraý oblysy ákimi Nurlan Noǵaevtyń tóraǵalyǵymen «Nur Otan» partııasy oblystyq fılıalynyń Saıası keńesi bıýrosynyń otyrysy ótti, – dep habarlaıdy Qamshy.kz aqparat agenttigi Atyraý oblysynyń óńirlik kommýnıkasııalar qyzmetine silteme jasap.

21 tamyzda Qazaqstannyń tuńǵysh Prezıdenti – Elbasy Nursultan Nazarbaevtyń tóraǵalyǵymen elimizdiń astanasynda partııanyń Saıası keńesiniń keńeıtilgen otyrysy ótip, partııanyń saılaýaldy baǵdarlamasynyń júzege asý barysy men sezderde berilgen tapsyrmalardyń oryndalysy talqylandy.

– О́z sózinde Elbasy partııany júıeli qaıta júkteý baǵdarlamasyn usyndy. Elbasy partııanyń belsendi múshelerin toptastyrýdy, barlyq deńgeıdegi partııa organdarynyń áleýetin meılinshe júzege asyrýdy, partııalyq jaýapkershilikti kúsheıtýdi tapsyrdy, – dedi N.Noǵaev.

О́ńir basshysy atap ótkendeı, partııaǵa degen senimdi arttyrý úshin barlyq qoıylǵan mindetter men berilgen ýádeler oryndalýy kerek. Bul maqsatqa qol jetkizýde barlyq partııa músheleri qajyrly eńbek etýi tıis – fraksııalardyń, bastaýysh uıymdardyń basshylary, depýtattar, memlekettik organdardyń ókilderi.

Partııanyń oblystyq fılıaly tóraǵasynyń orynbasary Baqbergen Qarabaev azamattardyń áleýmettik ál-aýqatyn jaqsartý jónindegi memlekettik baǵdarlamalardy oryndaý baǵytynda júrgizilip jatqan jumystar týraly baıandady.

Partııanyń aldynda turǵan mindet – korrýpsııanyń aldyn alý boıynsha jumysty kúsheıtý, aqparattyq strategııany túbegeıli qaıta qaraý, ıdeologııalyq jumysty kúsheıtý. Buny óńirdiń Qoǵamdyq keńesiniń tóraǵasy Murat О́teshev atap ótti. 

– Áleýmettik jelilerde, azamattardy jeke qabyldaýda keıde bizdiń atymyzǵa syn aıtylyp jatady. Memlekettiń mindeti – adamnyń bar múmkindigin júzege asyrýyna jaǵdaı jasaý, onyń damýyna yqpal etý. Basqasynyń barlyǵyna ol óziniń bilimimen, biligimen, kúsh-jigerimen qol jetkizýi tıis. О́ńirimizde jumysqa ornalasýǵa múmkindik jetkilikti, óz isin ashý úshin túrli baǵdarlamalar bar. Talpynǵan adamǵa árdaıym jumys tabylady. Eń bastysy – basqaǵa ıek artýdan, memleketke degen tutynýshylyq kózqarastan arylý qajet, – dep atap aıtty Nurlan Noǵaev. 

Bul baǵyttaǵy problemalyq másele – birqatar azamattar bireýge ıek artýǵa daǵdylanyp qalǵan. Otyrysta aıtylǵandaı, memleket shyn máninde muqtaj bolyp otyrǵandarǵa ǵana kómektesýi kerek.

Kóp balaly jáne az qamtylǵan otbasylaryn qoldaýdyń tıimdi quraly bir rettik kómek emes, jumysqa ornalastyrý, oqytý jáne qaıta oqytý, óz isin ashý úshin nesıeleý sııaqty sharalar bolýy tıis. Búginde oblysta 6,5 myń otbasy (36 myń adam) adresti áleýmettik kómek alady. Buǵan 1,9 mlrd teńge bólinip otyr. Osydan bir jyl buryn kómek alýshylardyń sany 2,2 myń otbasyn qurap, oǵan qajet qarajat 500 mln. teńgeden aspaıtyn edi. 

– Bul qýantarlyq kórsetkish emes. Keıde járdemaqy alý úshin tabystaryn jasyryp, semıalaryn buzatyn faktiler de kezdesip jatady. Alaıda, olardyń barlyǵy muqtaj adamdar emes. Sondaı-aq, eger adam tek joǵarydan kómek bolady dep úırenip ketse, ol eshnársege talpynbaı, aǵymmen júre beredi. Tek eńbekqorlyqtyń arqasynda ǵana adam tabysqa qol jetkizedi. Osyny jastardyń sanasyna sińirýimiz qajet. Erteń qyzmet etip, memlekettiń ıgiligin jasaıtyn solar. Búgingi tańda partııanyń aldynda turǵan mindet – barlyq áleýmettik jáne ekonomıkalyq máselelerdi qamtı otyryp, memleketimizdiń bastamalaryn ilgeriletý, qoǵamnyń belsendi toptary men jastardy tarta otyryp, partııalyq jobalardy iske asyrý. Alda úlken mindetter tur, biz solardy birlesip oryndaýǵa tıistimiz, – dep qorytyndylady Nurlan Noǵaev.