B.Saparbaev: Kásipkerler kimniń arqasynda shalqyp otyrǵanyn umytpaýy tıis

Berdibek Sarapbaev: Bizdegi baı-manaptarǵa kimniń arqasynda shalqyp otyrǵanyn esterine salatyn ýaqyt jetti

Keshe Taldyqorǵan qalasynda ótken aımaqaralyq  semınarda QR Vıse-premeri Berdibek Máshpekuly qaltaly kásipkerlerdi saýda-ortalyqtarynyń ornyna mektep, balabaqsha, kitaphana, murajaılar salýǵa shaqyrdy.  Bul týraly «Qamshy» portaly Vremıa basylymynyń saıtyna silteme jasaı otyryp habarlaıdy.

«Týǵan jerge taǵzym» aksııasy aıasynda Premer-mınıstrdiń birinshi orynbasary aldynda 4 birdeı oblys ákiminiń orynbasarlary men Almaty qalasy ákiminiń orynbasary  baıandama jasaǵan.

Birinshi bolyp, Almaty oblysy ákiminiń orynbasary Baqtııar О́nerbaev myrza sóz tizginin alyp, óńirdegi qaltaly azamattardyń halyq ıgili úshin jasap jatqan jaqsylyǵyn aıtqan bolatyn.

-Jaqsynyń jaqsylyǵyn aıt degen ǵoı, kásipker Baýyrjan Ospanov myrza óz qaltasynan qarjy bólip, Lepsi aýylynda sport mektebin salyp berdi. Sonymen qatar, Jylandy aýylynda sport keshenin salyp, tigin sehyn, saıabaq, kınotetr jáne fızıka-matemıtıkany tereńdetip oqytatyn lıseı salyp berdi. Al aty máshhúr sportshy Jaqsylyq aǵa Úshkempirov Jambyl aýdanynda sport keshenin ashty. Al kásipker Abaı Sádýaqasuly 120 oryndyq mektep pen 50 orynǵa shaqtalǵan jańa balabaqshany Jambyl aýdany turǵyndaryna tartý etti,-dep sózin túıindedi Baqtııar О́nerbaev. Al Mınıstr myrza orynbasardyń sózin bólmesten, muqııat tyńdady da, basyn shulǵyp, rızashylyǵyn bildirgendeı boldy. Biz osylaı qabyldadyq.

Al Almaty qalasy ákiminiń orynbasary Záýresh Amanjolovany  Vıse-premer   aıamady.  Almaty qalasyndaǵy kásipkerlerdi synaǵan Saparbaev kásipker Nurlan Smaǵulovqa erekshe toqtaldy.

-Biz Smaǵulovtyń qalaı baıyp otyrǵanyn bilemiz. Sen mynaǵan jaýap bershi, Záýresh. Smaǵulov jańaǵy mektep, balabaqsha, Mádenıet úıi men Sport keshenin óz qaltasynan aqsha shyǵaryp salyp berdi me?,-dep suraqty tótesinen qoıdy.

-Men Smaǵulov qandaı da bir qaıyrymdylyqqa mektep salyp berdi dep aıta almaımyn. Biraq ol Almaty qalasyndaǵy barlyq sharalarǵa belsendi qoldaý kórsetip keledi,-dep aqtalǵandaı boly Amanjolova.

- Ol «Týǵan jerge taǵzym» sekildi mańyzdy aksııaǵa qatysýy tıis edi.Elbasynyń tapsyrmasyn umytpaǵan jón. Ol bilýi tıis, kimniń arqasynda mıllıarder atanǵanyn,-dep shamyrqanǵan Saparbaev sózin ári qaraı jalǵady.

- Nurlan Smaǵulov Qazaqstannyń barlyq jerine saýda ortalyqtaryn salyp tastaýǵa shamasy jetedi. Al Almaty qalasynda balabaqsha jetispeýshiligi basty máselelerdiń biri ekenin ol bile me? Aıtý kerek, balabaqsha salyp bersin, áıtpese óziniń kóp kottedjiniń birin bersin. О́zi Jáýtikov mektebiniń túlegi. Nege sol sekildi úlken mektep salyp bermeske. Oǵan nege marqum bolǵan Nurlan Qapparovtan úlgi almasqa? Nege siz nemese Ahmetjan Esimov onymen sóılespeıdi? Nege aıtpaısyńdar oǵan? Ol bar qarjysyn saýdaǵa ǵana  salyp otyr. Bizge mektep, balabaqsha kerek dep aıtpaısyńdarma? Árıne, Qazaqstannyń ekonomıkasyn kóterý úshin, jańa jumys oryndaryn ashý úshin, salyq úshin saýda mańyzdy. Biraq, ol Elbasynyń bastamysn qoldaýy kerek edi,-dedi Berdibek Máshpekuly.

Al mınıstr myrzanyń sógisine jaýap qata almaǵan orynbasar hanym únsiz basyn shulǵyp otyrdy.

-Mynany bizdiń eldegi qaltaly kásipkerlerdiń esine salatyn ýaqyt jetti. Olardyń árqaısysy Elbasynyń kóregen saıasatynyń jáne Táýelsizdiktiń arqasynda baıyp, shalqyp otyr. Olardyń árqaısysy ózderin baptaǵan, ósirgen týǵan aýyldaryna mektep, balabaqsha sekildi áleýmettik mańyzdy nysandar salyp berýge shamalary jetedi emes pe?! Bul azamattyq ári adamgershilik paryzdary ǵoı. Adam úshin týǵan jerden artyq qandaı baılyq bar. Sony oılaný kerek,-dedi QR Premer-Mınıstriniń birinshi orybasary Berdibek Máshpekuly.

Nurgeldi Ábdiǵanıuly