Jambylda kúre joldyń qurylysy bastaldy

Jambyl oblysy Qyrǵyz Respýblıkasynyń birqatar aımaqtarymen shekaralas ornalasqandyqtan da eki aradaǵy alys-beris te, barys-kelis te úzilgen emes. Deıturǵanmen Taraz qalasynyń syrtymen ótetin aınalma joldyń bolmaýy shahardyń negizgi kóshelerindegi kólik qozǵalysyna keri áserin tıgizip kelgen-di. Endi mine, bul olqylyqtyń da orny tolatyn kún jaqyn. Taıaýda kórshi elmen baılanystyratyn kúre joldyń qurylysy bastaldy. Bul «Nurly jol» memlekettik baǵdarlamasynyń jemisi ekendigin aıta ketken jón.

Búgingi tańda «Aısha bıbi» kedendik beketi ornalasqan «Taraz – О́tmek Qyrǵyzstan shekarasy» avtojolynyń boıynda qyzý jumys júrgizilip jatyr. Jobanyń iske asyrylýy óz kezeginde 100 myńǵa jýyq turǵynnyń kólikpen qatynaýyn qamtamasyz etpek. Sonymen qatar tranzıtti aýyr júk kólikteriniń qalany ońtústik betten jyldam jáne qaýipsiz júrip ótý múmkindigine qol jetkizbek. Bul óz kezeginde halyq turmysynyń, qala ekologııasynyń jaqsarýy men jalpy óńirdiń damýyna orasan zor úlesin tıgizeri sózsiz.

– Jalpy joldyń uzyndyǵy 16 shaqyrymdy quraıdy. Onyń 1,7 shaqyrymy Taraz qalasynyń aýmaǵymen ótedi. Qalǵany 14,3 shaqyrymy Jambyl aýdanyna tıesili. Sol arqyly kúre jol «Aısha bıbi» kedendik beketine tireledi. Quny 4 mıllıard teńge bolatyn atalǵan jobany «Qazahdorstroı» JShS iske asyryp jatyr. Bul qarjynyń 90 paıyzy respýblıkalyq, qalǵan 10 paıyzy oblystyq bıýdjetten bólinip otyr. Búginde qurylys jumystaryna 40 tehnıka jumyldyrylǵan,-deıdi Jambyl oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.

Bilgenimizdeı bıyl qurylys jumystaryna 880 mıllıon teńge bólingen. Munyń 800 mıllıon teńgesi respýblıkalyq bıýdjetten bólinse, qalǵan bóligi oblystyq bıýdjetten qaralypty. Osynshama qarjyǵa 4 shaqyrym jerge asfalt salý josparlanyp otyr. Aıta keterligi, salynatyn joldyń astynan 57 sý qubyrlary júrgiziledi. Sondaı-aq eni 24 metrdi quraıtyn kópir de salynbaq.

Al «Qazahdorstroı» JShS-niń basshysy Maıra Sultanqyzynyń sózinshe, salynǵaly jatqan jol sazdy, sheńgeldi jerden ótedi eken. Búginde onyń 6 shaqyrymy arnaıy tehnıkanyń kómegimen qoparylyp retke keltirilgen. Sondaı-aq qubyrlar ornalastyrylypty. Sazdy jer bolǵandyqtan sý jol salýǵa kedergi keltirmeı qoımaıdy. Sondyqtan merdiger kompanııa jerdi retke keltirý barysynda ák qoldanyp jatyr eken. Bul óz kezeginde sýdy soryp, jerdi qataıtatyn kórinedi.

Eger joba sátti júzege asatyn bolsa, Qyrǵyz Respýblıkasynan shyǵatyn júk kólikteri qalaǵa kirmeı, osy jol arqyly qatynaıtyn bolady. Sondyqtan joldyń shydamdylyǵy 13 tonnaǵa eseptelipti. Bul óz kezeginde

Abaı dańǵyly boıyndaǵy kólik qozǵalynyń retke keltirilýine de oń septigin tıgizbek.