Qazaqstandyq jáne sheteldik kýrorttardaǵy baǵa aıyrmashylyǵy (saraptama)

Jaz shyqty. Arqa keńeıdi. Jyl on eki aı jumysta júrip,  ábden qaljyraǵandar endi eńbek demalystaryn jaqsy ótkizýdi kózdeıdi. Bireýleri  aýylǵa, týysqandarynyń úıine nemese  taýly aımaqtarǵa ketedi. Al endi bireýleri demalys ýaqyttaryn Qazaqstandaǵy demalys oryndarynda ótkizedi. Alaıda kóp jaǵdaıda qazaqstandyqtar jaz shyqsa boldy,  shetel asyp ketýdi ádetke aınaldyryp alǵan. Túrkııa, BAÁ, Malaızııa t.b. Sebep bireý, qazaqstandyq demalys oryndarynyń baǵasyn árkimniń qaltasy kótere bermeıdi jáne kórsetiletin qyzmen sapasy tómen. Bul básekege qabilettilik joq degendi bildire me? «Qamshy» portaly qazaqstandyq jáne sheteldik kýrorttyq bazalardyń servısterine salystyrmaly túrde saraptama jasaǵan edi.

Byltyrǵy jyly QR Indýstrııa jáne jańa tehnologııalar mınıstrligi  «Qazaqstan týrızmnen jylyna 10 mıllıard dollar paıda tabatyn bolady» dep jarııaǵa jar salyp edi. Aıtpaqshy Qazaqstandaǵy týrızmdi damytýdyń 2020 jylǵa deıingi tujyrymdamasyna da osy maqsat qoıylǵan.  Tabysy ortasha qazaqstandyqtar ázirshe shetelde demalǵandy jón kóredi. Al el úkimeti ishki týrızmdi damytýdy ǵana emes, Qazaqstanǵa shetelden týrısterdi tartý josparyn da málimdedi.  Tujyrymdama týrızm salasynan túsetin kiristi 10 mıllıard 200 mıllıon dollarǵa deıin, al elge keletin týrıster sanyn 8 mıllıon 500 myń adamǵa deıin jetkizý sııaqty iri mindetter qoıyp otyr. Degenmen, týrıster men sarapshylar, qarapaıym qazaqstandyqtar onyń oryndalatynyna senbeıdi.

Sonymen, nege ortasha tabysty qazaqstandyqtar alys-jaqyn shetelde demalǵandy jón kóredi? Salystyryp kóreıik.

Qazaqstandyq demalys oryndary:

Almaty qalasy jáne qala mańy

Biz Almaty qalasy mańynda ornalasqan 5 juldyzdy demalys oryndarynyń birine qońyraý shaldyq. 1 kúndik demalys úshin kórsetiletin qyzmet sapasyn, baǵasyn jáne demalysty joǵarǵy deńgeıde ótkizý úshin qandaı jaǵdaılar qarastyrylatynyn bildik. Bizge usynylǵan Praıst paraqshada kórsetilgen málimetter mynadaı boldy.

Jaǵajaıda demalý úshin  dúısenbi – juma kúnderi  eresekter úshin  adam basyna– 4500 teńge bolsa,  12 jasqa deıingi balalarǵa tegin. Senbi-jeksenbi kúnderi jaǵajaıǵa kirý quny – 7500 tg. Al 12 jasqa deıingi balalar úshin ádettegideı tegin emes, 4000 teńge tóleýge mindetti. Aıtpaqshy, munda súrtinýge arnalǵan oramaldardyń ózi aqyly. Quny – 500 teńgeden bastalady. VIP kıim aýystyrý bólmeleri – 15 myń, VIP shatyr – eresekter úshin – 60 myń, balalar úshin 30 myń teńge. Laýndj aımaq – 100 000 teńgeden bastalady. Munyń ishine tamaq, sýsyn, t.b. kirmeıdi.  Al eger birneshe kúndik týr úshin, qonaq úı alǵyńyz kelse 2 adamǵa arnalǵan kotedj úılerdiń quny – 50 myń teńgeden bastalady. Munyń ishine tek tańǵy as kiredi. Al árbir artyq adam úshin – 5000 teńge. Sonymen, 1 kúndik demalys úshin – 1 adamǵa 183 myń teńge jumsaıdy ekenbiz. Árıne, demalysty kóńildi ótkizý úshin siz jalǵyz barmaısyz. Otbasyńyz, dostaryńyz nemese áriptesterińiz bar. Iаǵnı, siz jyl boıyp tirnektep tapqan qarajatyńyzdy bir-aq kúnde shashyp jiberýińiz múmkin.

Al Býrabaıdaǵy demalys oryndaryndaǵy 10 kúndik joldama quny 350 myń teńgeden bastalady.

Sheteldegi jazǵy demalys maýsymy

Jazǵy eńbek demalystaryn ala salysymen, qazaqstandyqtardyń basym kópshiligi  Túrkııaǵa baǵyt alady. Nege? Endigi jerde biz Qazaqstandaǵy týrıstik agenttikterge habarlasyp, jazǵy demalys maýsymyn qandaı elderde ótkizýge bolatynyn bildik. Qaltaǵa salmaq salmaıtyn ári qyzmet kórsetý sapasy joǵary demalys oryndaryn qaıdan tabýǵa bolady?

Laýra Japasheva, týrıstik agent:

-Túrkııanyń eń keremet degen demalys oryndarynda jaqsy ýaqyt ótkizý úshin maksımaldy qolaılylyqtar jasalǵan. Mysaly, Antalııadaǵy teńiz jaǵasyna 10 kúnge barý úshin 2 adamǵa nábári – 1800 dollar ketedi.  Munyń ishine 4-5 juldyzdy qonaq úı, kúnine 5 ýaqyt tamaq, týr, jaǵajaı t.b. bári qamtylǵan. Ushyp barý, ushyp qaıtý quny osynyń ishine kiredi.  Al Birikke Arab Ámirlikterindegi demalys oryndarynyń baǵasy sál qymbattaý. Munda 10 kúndik sapar úshin 2 adamǵa 2000 dollar ketedi. Ishine 5 juldyzdy qonaq úıler, 3 mezgil tamaq,  vıza, týr t.b. kiredi. Biz kóshpeli týrızmmen aınalysamyz. Shetelde bizdiń týrısterdi qýana qarsy alady. Qazaqstandyq qonaqúılermen salystyrǵanda, olarda baǵa da arzan, ınfraqurylymy da jaqsy. Qazaqstan qonaqúılerinde baǵa tym qymbat, al órkenıettiń izi de joq.

Túıin: Sandyq kórsetkishterdiń ózderi-aq, qazaqstandyqtardyń shetelderde demalýǵa qumar ekendikterin aıǵaqtap tur. Al «qazaq týrızmi týrısterdi qaıtip damymaq» degen zańdy saýal týyndaıdy.

Iаǵnı, árbir demalýshy servısi tómen, baǵasy qymbat demalys oryndaryna góri, qyzmet sapasy da, baǵasy da qalypdy, qalta kóqtererlik shet elderde demalǵandy jón sanaıdy. Oǵan bola olardy aıyptaı almaısyz. Sondyqtan, qazaqstandaǵy kýrorttyq bazalarǵa tolyqtaı ózgerister engizetin, baǵany qoljetimdi ári turaqty etý úshin reforma qabyldaıtyn ýaqyt jetken bolar.

Nurgeldi Ábdiǵanıuly