Alǵys arqalaǵan abzal jan

Árbir adamnyń ómirine arasha túsetin dárigerlik mamandyqty tańdaý kim-kimge de bolmasyn úlken jaýapkershilik júkteıdi. О́ıtkeni dárigerler adamnyń jan-dúnıesin óte tereń bilýmen qatar, adam taǵdyryna nemquraıdy qaramaıtyn, kúızeliske tózimdi, júıkesi myqty jan bolýy shart. Olaı deıtinimiz, aq halatty jandardyń aldyna kún saıyn baltyry syzdap, basy aýyrǵan qanshama jan keledi. Sondyqtan da qajyrly jumys ıeleri - aq halattylar halyqtyń alǵysyn arqalaǵan jandar. Ásirese, shalǵaı eldi mekenderde turatyn aýyldyqtar dárigerdiń kómegine zárý keletini belgili ǵoı. Mine, osyndaıda bar bilimi men biligin kádege jaratyp, eldiń yqylasyna bólenip júretin erekshe mamandar bolady. Solardyń biri – Borankúl Abısheva.

Oblys ortalyǵynan eń shalǵaı ornalasqan Moıynqum aýdanynda turatyn aq halatty aýdandyq aýrýhanada bas dárigerdiń ádistemelik-uıymdastyrý jónindegi orynbasary bolyp qyzmet atqarady. 33 jyldan beri atalmysh qumdy ólkede qyzmet etip júrgen ol osy aýdannyń týmasy eken. 1977 jyly osyndaǵy Jambyl atyndaǵy mektepti bitirgennen keıin Semeı memlekettik medısınalyq ınstıtýtynda pedıatrııa mamandyǵy boıynsha bilim alyp, ony úzdik baǵamen támamdaǵan. Keıinnen Jambyl oblysyndaǵy balalar aýrýhanasynda ınternatýradan ótip, 1986 jyly týǵan jerine kelip pedıatr retinde jumysqa ornalasady. Jalpy, medısına salasy – jaýapkershiligi mol, ári óte kúrdeli sala ekeni belgili. Kerek deseńiz, bul jolda eńbek etý úshin birneshe jyl oqýdyń ózi azdyq etedi. Atalmysh salany tolyqqandy ıgerý úshin uzaq jyldar boıy úzdiksiz tájirıbe jınap, mamandyq boıynsha bilimi men biliktiligin tolyqtyryp otyrýdyń qajet ekeni aıtpasa da túsinikti. Osyny jete túsingen Borankúl Sámekqyzy 1993 jyly Almaty qalasyna baryp teri jáne venerologııa aýrýlary boıynsha úsh aılyq oqýdy bitirip, bilimin jetildirip kelgen. Osylaısha, birneshe jylda medısına salasynyń qyr-syryna ábden qanyqqan abzal jan 2002 jyly aýdandaǵy klınıkalyq-dıagnostıkalyq emhananyń meńgerýshisi qyzmetine taǵaıyndalady. Araǵa tórt jyl salyp dál osy emhananyń bas dárigeri qyzmetine deıin kóteriledi.

– Árıne, medısına úlken jaýapkershilikti talap etetin sala. Munda sál de bolsa bosańsyp, salǵyrttyqqa jol berýge múlde bolmaıdy. Eńbektegen baladan eńkeıgen qarııaǵa deıin saǵan senim bildirip keledi. О́zińe sondaı jaýapkershilik artqan soń barynsha tııanaqty bolýǵa tyrysasyń. Negizinen, bala kezimnen-aq osy salaǵa ańsarym aýyp, dáriger bolýdy armandaıtynmyn. Alla sátin salyp, mektep bitire salysymen armanyna qol jetkizdim. О́zimniń týǵan aǵam da osy salada qyzmet jumys isteıdi. Búginde eki qyzymnan tórt nemere súıip otyrmyn. Aýdanymyzdaǵy aýrýhanaǵa qarasty 49 dáriger men 238 orta býyndy medısınalyq qyzmetkerler jumys isteıdi. Búginde elýdiń eńserip, alpysqa aıaq basqaly tursam da qolymnan kelgenshe osyndaı jas mamandarǵa jol siltep, tájirıbemmen bólisip kelemin, - deıdi Borankúl Sámekqyzy.

О́z mamandyǵyn maqtanysh emes, úlken jaýapkershilik dep sezinetin dáriger qashanda qarapaıymdylyǵynan tanǵan emes. Ol óziniń eńbekqorlyǵy men biliminiń arqasynda medısına salasynyń san satysynan ótip, búginde tájirıbesi tolysqan aq halattylardyń qatarynda júr. Máselen, osydan 33 jyl buryn aýdanǵa pedıatr bolyp kelgen jas maman 2006-2011 jyldary aýdandyq emhanada bas dáriger, 2011-2018 jyldary aýdandyq aýrýhanada bas dárigerdiń medısınalyq kómektiń sapasyn baqylaý jónindegi orynbasary bolyp istegen. Osy jyldar aralyǵynda túrli marapattarǵa da ıe bolǵanyn aıta ketý kerek. Dálirek aıtsaq, azamattardyń densaýlyǵyn saqtaý isine qosqan jeke úlesi men minsiz adal eńbegi úshin densaýlyq saqtaý mınıstriniń Qurmet gramotasymen, oblys ákiminiń Qurmet gramotasymen, sondaı-aq, «Densaýlyq saqtaý isine qosqan úlesi úshin» tósbelgisimen jáne «Qazaqstan Konstıtýsııasyna 20 jyl» merekelik medalimen nagradtalǵan.

Ras, aýrýdyń jasqa da, kárige de qaramastan, urymtal jerden soǵa beretini aqıqat. Osyndaıda, qyl ústindegi adam taǵdyryn arashalaýshy aq halatty abzal jandar kómekke keledi. Sondyqtan da, osynaý abzal mamandyq ıesi altyn qoldy dárigerler qaýymyna besiktegi baladan esiktegi qarııaǵa deıin aıtar alǵysy sheksiz ekendigine shúbámiz joq. Endeshe, qınalǵanda kómek surap, aýyrǵanda shıpa izdep aldyna barǵan kez kelgen naýqasqa qoldaý kórsetetin, ómirlerine qaýip tóngen sátte arasha túsip, tipti, keıde ekinshi ómir syılap jatatyn barsha dárigerlerimizdi tól merekelerimen shyn júrekten quttyqtaımyz!