Kólginov iske kiristi: Jańa ákim qalany aralady (foto)

Nur-Sultan qalasynyń ákimi Altaı Kólginov qalany kezekti aralaý kezinde qurylysy uzaqqa sozylǵan problemaly turǵyn úı keshenderiniń úleskerlerimen kezdesti dep habarlaıdy Qamshy.kz aqparat agenttigi. Bul týraly jańa ákim Facebook paraqshasynda málimdedi. 

"168 adam qarajatyn salǵan "Garant" kóppáterli turǵyn úı kesheniniń qurylys basyna bardym. Úıdi salýdy "Azbýka jılıa" 2011 jyly bastaǵan. Qazir memlekettik qoldaýdyń arqasynda bul obektiniń qurylysy jalǵasyn taýyp, 2020 jyldyń sáýir aıynda tapsyrylý kózdelip otyr. 

"Shubar" turǵyn alabyndaǵy "Komfort de Luxe" TK úleskerlerimen de sóılestim. Munda 227 adam 2012 jyldan beri baspanalaryn kútip júr eken. Bul obektini osy jyldyń jeltoqsan aıynda aıaqtaý josparlanǵan. 

Qalada úleskerlerdiń qarjysy salynǵan qurylysy aıaqtalmaǵan 51 problemaly obekt qaldy. Olardyń qurylysy bıýdjet esebinen (qaıtarymdy qarajat) aıaqtalady.

Ár apta saıyn bir-eki problemaly kóppáterli turǵyn úılerdi aralap turamyn. Josparly keste túzildi. Qurylystyń aıaqtalý prosesin jáne sozylyp ketken úleskerler máselesiniń túbegeıli sheshimin tabýdy baqylaýda ustaımyn.", - delingen qala ákiminiń jazbasynda