Aıt namazynyń aldynda qandaı amaldar jasaý kerek?

Aılardyń sultany — Ramazannan keıin musylman qaýymynyń aıtýly merekesi aıt bastalady. Aıttyń birinshi kúni tańda aıt namazy oqylady. Qamshy.kz aqparat agenttigi ummet.kz saıtynyń deregin negizge ala otyryp, aıt namazy bastalmas buryn qandaı amaldar jasaý kerektigin oqyrmandar nazaryna usynady.

Paıǵambarymyzdyń (ﷺ) kórsetip ketken tómendegideı amaldaryn isteý súnnet bolady:

Pitir sadaqasyn berý. Aı boıy pitir sadaqasyn berýge úlgirmegen kisiler bolsa, aıt namazynan buryn berý kerek. Odan keıin berilse ol pitir sadaqa bolyp sanalmaıdy.

Ǵusyl alý. Jýynǵanda tutas denege sý tııýin qadaǵalaǵan durys. Jetkilikti sýmen aýyz qýysyn, muryndy da shaıý kerek.

Mısýak qoldaný. Aıt namazy oqylatyn meshitter áleýmettik oryn bolǵandyqtan aýyz qýysynyń tazalyǵyne mán berý kerek. Bul musylmannyń sıpattarynyń biri. Paıǵambarymyzdyń (ﷺ) árdaıym qoldanǵan mısýak tutynǵan. Bul - súnnet amal. Alaıda, mısýak bolmaǵan jaǵdaıda tis pastasy, shetkasyn da qoldansańyz quba-qup.

Jaqsylyq jasaý. Basqalarǵa rýhanı-materıaldyq qol ushyn berý, kómek kórsetý. Sonymen birge aıt namazyna jetkizip salý, tipti aınalańyzdaǵy adamdarǵa jyly sóz sóılep, ashyq qabaq, jyly shyraı tanytý da jaqsylyq sanalady.

Eń táýir ári taza kıim kııý. Jańa nemese taza, útiktep, jarasymdy, úılesimdi kıim kıip barǵan abzal.

Namazǵa erte barý. Sharıǵı turǵyda erte kelý kóp saýapqa sebep bolatyn bolsa, qala berdi bul daǵdynyń jeke tulǵanyń damýyna da paıdasy orasan. Kóbirek Quran tyńdap, ýaǵyzyn estýge, aıt namazyna úlgerip, sońynan hutbany da tolyq tyńdaýǵa múmkindik alasyz.

Qurma jep shyǵý. Alla Elshisi (ﷺ) oraza aıt namazyna shyǵardan buryn úıinen sany taq bolatyndaı (1, 3, 5, ...) qurma jep shyǵatyn bolǵan.

Meshitke barar jolda tákbir aıtý. Rabbymyzǵa «Allahý ákbar(Alla ulyq)» degen sııaqty madaq-zikirler aıtqan jón.