Aqmola oblysynda bulshyq etin ósirmek bolǵan tórt jasóspirim komaǵa tústi

Aqmola oblysy Ereımentaý aýdandyq aýrýhanasynyń jan saqtaý bólimine tórt kámeletke tolmaǵan bala tústi. Olar uıqyǵa jatarda 15-ten fınlepsın tabletkasyn iship, bulshyq etin ósirmek bolǵany anyqtaldy dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Jasóspirimder aýdandyq aýrýhanaǵa tańerteń saǵat úshten keıin birinen keıin biri túsken. Olar 16, 14 jáne 13 jasta. Bári Oljabaı batyr aýylynda turady.  

Aqmola oblysy densaýlyq saqtaý basqarmasynyń málimetinshe, balalar aýyr jaǵdaıda bolǵan, qatty ýlanǵannan deneleri qurysyp, júıke júıesi zaqymdanǵan.  

"Jasóspirimder fınlepsın preparaty arqyly bulshyq etin ósirmek bolǵany anyqtaldy. Árqaısysy 15 tabletkadan ishken", - dep habarlady oblystyq densaýlyq saqtaý basqarmasy.

Balalarǵa dárini aýrýhanaǵa túskenderdiń biri bergen. Aıta keteıik, ol "epılepsııa" dıagnozymen dıspanserde esepte turady.

Qazirgi tańda jasóspirimder jan saqtaý jáne qarqyndy terapııa bólimderinde jatyr. Balalardyń biri esin jıdy.

Fınlepsın preparaty epılepsııany emdeýde, sonyń ishinde naýqastyń ustamasy ustaǵan jaǵdaıda qoldanylady. Osydan keıin dári uldardyń biriniń qolyna qalaı túskeni aıtpasa da túsinikti bolsa kerek. Preparatty mólsherden tys tutyný júrek pen búırektiń jumysyn, qan túzý, tynys alý júıesin buzady. Bulshyq etti ósirý áseri dárigerlerge belgisiz.

Usynǵan: Maqpal Sembaı