Múgedek balalary bar otbasylarǵa beriletin kómekti ulǵaıtý máselesi qarastyryldy

Baýyrjan Baıbek múgedek balalary bar otbasylarǵa beriletin adrestik kómekti ulǵaıtý jáne turmysy tómen otbasylardyń ekinshi balasynan bastap bala baqsha shyǵynynyń ótemaqysyn tóleý sharalaryn qarastyrýdy tapsyrdy.

«Nur Otan» partııasy qalalyq fılıalynyń kezekten tys konferensııasynda Almaty ákimi Baýyrjan Baıbek quramyna memlekettik járdemaqy, adrestik kómek, áleýmettik tólem, demeýshilik kómek, eńbekpen qamtý jáne basqalary engen qoldaýdyń keshendi sharalaryn atap ótti.

«Úıde múgedek balalardy oqytýǵa ketetin shyǵyndy óteý úshin beriletin ótemaqy men ómirlik qıyn jaǵdaıǵa tap bolǵan kezde beriletin bir rettik adrestik kómek kólemin ulǵaıtýdy qarastyrǵan jón. Eger otbasy kópbalaly bolsa, onda baldyrǵandy bala baqshaǵa ornalastyrý da qıyn. Turmysy tómen kópbalaly otbasylardyń ekinshi balasynan bastap bala baqshaǵa ketetin shyǵynnyń ótemaqysyn tóleý máselesin  zertteý qajet», - dedi Baýyrjan Baıbek.

Aıta keterligi, Almaty ákimi kópbalaly otbasylarǵa zańnamalyq jáne psıhologııalyq keńester, reabılıtasııalyq kómek kórsetetin «Baqytty otbasy» ortalyǵyn qurýdy tapsyrdy. Bul bir tereze qaǵıdasy boıynsha jumys jasaıtyn servıstik ortalyq bolyp tabylady, osy arqyly kópbalaly analardy jumysqa ornalasa alady. Budan ózge, megapolıs basshysy 4 jáne odan kóp balalary bar otbasylardyń turǵyn úı alý úshin tólenetin alǵashqy jarnasynyń tólemin sýbsıdııalaý múmkindikterin qarastyrýdy tapsyrdy.

Almaty qalasy ákiminiń tapsyrmasy boıynsha kópbalaly otbasylarǵa beriletin adrestik kómektiń kólemin ulǵaıtý, ystyq jáne sýyq sý eseptegish qondyrǵylaryn ornatýǵa ketetin shyǵyndarǵa ótemaqy berý máselesi qarastyrylady.

Áleýmettik ál-aýqat, strategııa jáne bıýdjet basqarmalaryna jáne basqa da quzyrly organdarǵa bir apta ishinde osy máseleler boıynsha jumys jasaý jáne naqtyly usynystar aıtý tapsyryldy.