Kosarev ashýly: Lenınniń basy qoqysta jatqan qalada qalaı ómir súremiz?

Qazaqstandyq depýtattar Lenınniń eskertkishine alańdaýly ekenin jetkizdi dep jazady Qamshy.kz aqparat agenttigi sputniknews.kz saıtynyń deregin negizge alyp.  

Májilis depýtaty Kosarevtiń aıtýynsha, qazaqtyń tarıhı eskertkishterinen bólek, keńes kezindegi qundylyqtar da saqtalyp qalýy kerek. Sondaı-aq keńes kezindegi eskertkishterdiń saqtalýy týraly arnaıy qujatta da kórsetilýi qajet. 

"Keńes kezindegi eskertkishterdi saqtap qalý qajet. Sebebi bizde moraldyq turǵydan jaýapkershilik bar. Lenınniń basy qoqysta jatqan qalada qalaı ómir súremiz? Bizde qoǵamnyń mádenıetine jaýap beretin Mádenıet jáne sport mınıstrligi bar emes pe?", deıdi Kosarev. 

Al Arystanbek Muhamedıuly Kosarevtiń pikirimen kelisetinin jetkizdi. 

"Iá, sizdiń pikirińiz oryndy. "Lenın ómir súrdi, tiri jáne ólmeıdi", degen uran bar edi ǵoı", dep ázildedi mınıstr. 

Sondaı-aq Arystanbek Muhamedıuly, bul máselege qatysty túrli is-sharalardyń atqarylyp jatqanyn aıtty. Mınıstr Almatydaǵy Saryarqa parkin mysalǵa keltirdi. 

"Siz sol jerge baryp, demalyp, gúl qoısańyz da bolady. Biz bárimiz 22 sáýirde (Lenınniń týǵan kúni — Red.) sol jerde bolýymyz kerek, árıne", - deıdi Arystanbek Muhamedıuly.

Aýdarǵan: Ásel Bolatqyzy