12 Aqpan, 2019 NEWS
Baqytjan Saǵyntaev: Qys kelip, úı órtenip jatady, al bárimizdiń baıandamamyz keremet
Astana qalasynda búgin kezekti Úkimet saǵaty bolyp ótti
Astana qalasynda búgin kezekti Úkimet saǵaty bolyp ótti. Jıynda premer-mınıstr Baqytjan Saǵyntaev 4 aqpan kúni Astana qalasynda bolǵan qazaly oqıǵaǵa baılanysty bes balanyń qazasynan keıin jaýapty sheneýnikter jazalanǵanyn aıtty dep jazady Qamshy.kz aqparat agenttigi.
Sonymen, Baqytjan Saǵyntaev búgingi jıynda TJK tóraǵasynyń orynbasary Barat Duzaqbaevty qyzmetinen bosatty.
-Barat Ospanuly uzaq jyldar boıy Astananyń tótenshe jaǵdaılar departamentin basqaryp keldi. Sońǵy kezde ǵana komıtetke aýysqan, - dedi Saǵyntaev.
Sondaı-aq, premer-mınıstr "órt qaýipsizdigi jáne onyń aldyn alý sharalaryn tıisinshe atqarmady, baqylaý júrgizbedi" dep Ishki ister mınıstriniń orynbasary Iýrıı Vıktorovıch Ilınge jáne Tótenshe jaǵdaılar komıtetiniń tóraǵasy Vladımır Bekkerge qatań sógis jarııalady.
Jazaǵa ilikken shendiler qatary astanalyq tótenshe jaǵdaılar departamenti basshysynyń mindetin atqarýshy Marǵulan Topashuly Amanbaevpen tolyqty. Oǵan da premer-mınıstr Baqytjan Saǵyntaev qatań sógis jarııalady.
«Qazirgi ýaqytta qandaı máselelerdi sheshýimiz kerek? «Baıaǵy jartas, sol jartas» degen sóz bar. Sý tasqyny keledi, úıler sýdyń astynda qalady, qys keledi, úıler órtenip jatady. Al bárimizdiń baıandamamyz keremet. Mınıstrler qandaı kemshilikterdiń bar ekendigin aıtty, sol týraly jaýap berý kerek. Ne sebepten qarjylandyrý máselesi sheshilmedi? Nege berilmedi, nege iske qosylmady? О́rtke ne sebepti jol berildi? Qandaı tekseris júrgizilip, nedeı sharalar qabyldandy? Ol týraly bir aýyz sóz joq. Aıtatyndaryńyz «bári keremet, bári jaqsy, qatań baqylaýda». Qandaı baqylaýda ekendigin kórip otyrmyz», - dep aıtyp ótti Baqytjan Saǵyntaev.
Usynǵan: Nazerke Labıhan
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir