Mınıstr Ábilqasymova ózin "otstavkaǵa ketsin" degenderge jaýap berdi

Mınıstr aldaǵy ýaqytta memlekettik saıasattyń tıimdiligin arttyrý boıynsha sharalar qabyldanatynyna sendirdi.

Eńbek jáne halyqty áleýmettik qorǵaý mınıstri Madına Ábilqasymova áleýmettik jelilerde halyqtyń "otstavkaǵa ketsin" degen talabyna qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtynyń málimetine súıene otyryp.

Jýrnalıster mınıstrden otstavkaǵa ketý týraly surady.

-Eń kúrdeli máseleler bizdiń mınıstrlikke qaraıtyndyqtan, syndy da jıi estımiz. Eń bastysy, biz osy synnan oı túıip, qorytyndy jasaımyz, jaǵdaıdy jaqsartýǵa tyrysamyz. Aldaǵy ýaqytta memlekettik saıasattyń tıimdiligin arttyrý boıynsha sharalar qabyldanady, - dep sendirdi Ábilqasymova.

Aıtýynsha, jergilikti jerlerde jedel shtabtar qurylyp, olar kópbalaly otbasylardyń nege muqtaj ekenin anyqtap, olardan usynystar jınap jatyr.

-Barlyq usynys jumys tobynda qaralady. Jumys tobynyń kezekti otyrysy osy beısenbide ótedi dep josparlandy. Oǵan jurtshylyq ókilderin, sarapshylardy shaqyrý oıymyz bar. Jumys tobynda áleýmettik qoldaýdy jaqsartý men memlekettik qoldaýǵa muqtaj otbasylardy qorǵaýǵa qatysty keshendi sheshimder usynylady degen oıdamyn, - dedi mınıstr.

Ol qazirgi tańda ártúrli baǵyt boıynsha kóptegen usynys túskenin atap ótti. Olar ataýly áleýmettik kómek kórsetýdi jaqsartý, járdemaqy mólsherin qaıta qarastyrý, baspana qoljetimdiligi máseleleri.

-Tıisti esepteýler daıyndalyp, analız júrgizilip jatyr, barlyǵy jumys tobyna shyǵarylady, - dedi Ábilqasymova.

Esterińizge sala keteıik, bir otbasyndaǵy bes balanyń ómirin jalmaǵan órt 4 aqpan kúni Astanada Kóktal-1 aýdanynda boldy. Apaly-sińlili bes qyz túnde úıde jalǵyz qalǵan, ata-anasy jumysta bolypty. О́rt saldarynan 2006, 2009, 2014, 2016 jáne 2018 jyldary týǵan bes bala kóz jumdy.

Usynǵan: Nazerke Labıhan