«JANAZA JÁNE JERLEÝ RÁSIMDERI» KITABYNYŃ TUSAÝY KESILDI

Almatydaǵy Qazaqstan Respýblıkasynyń Ulttyq kitaphanasynda Ǵulamalar keńesiniń bekitýimen jaryq kórgen «Janaza jáne jerleý rásimderi» kitabynyń tusaýkeser rásimi ótti dep habarlaıdy Qamshy aqparattyq agenttigi muftyat.kz-ke silteme jasaı otyryp.

Bas múftı Erjan qajy Malǵajyuly qatysqan dóńgelek ústelde as berýde ysyrapqa jol bermeý, jerleý rásimderine qatysty dástúrlerdi bir izdilendirý máseleleri talqylandy. Dóńgelek ústeldi moderator – QMDB Ǵulamalar keńesiniń hatshysy, ıslamtanýshy, teolog Ershat Ońǵarov júrgizdi.

Jazýshy-qalamger Smaǵul Elýbaı, Ulttyq kitaphana dırektory Janat Seıdýmanov, fılologııa ǵylymdarynyń doktory, professor Sársenbi Dáýituly, Tarıh ǵylymdarynyń doktory, professor Ábdesh Tóleýbaev, «Qazaq ensıklopedııasynyń» bas dırektory, professor Baýyrjan Jaqyp, fılosofııa ǵylymdarynyń doktory jazýshy, ǵalym Nurdáýlet Aqysh t.b. aqyn-jazýshylar ýaqyttyń suranysyna saı shyqqan «Janaza jáne jerleý rásimderi» kitaby jaıly oılaryn ortaǵa saldy. Basqosýǵa qatysqandar qazirgi qoǵamda talqylanyp júrgen máselelerdiń biri qabir basyna kesene turǵyzyp, belgi qoıý, musylman zıratynyń talaptary men qaǵıdalary, dinı joralǵylardy bir júıege keltirý máselelerin talqylady.

 «Bul kitap Ǵulamalar keńesinde 2 jyl qaralyp, daıyndaldy. Kitapta janazaǵa qatysty úkimder toptastyryldy. Qaıtys bolǵan kisini jerleý, qudaıy as pen sadaqa berýdiń ádebi jan-jaqty qamtyldy. «Janaza jáne jerleý rásimderi» kitabyn shyǵarýdaǵy negizgi maqsat – elimiz boıynsha dinı rásimderdi bir izge keltirý, ysyrapqa, sharıǵatqa qaıshy ádetterge jol bermeý. Qazir Aqtóbe, Pavlodar oblystarynda qudaıy astyń ortaq máziri bekitildi. Zııaly qaýym ókilderin, jýrnalısterdi elimizde dinı rásimderdi bir izge túsirý maqsatynda shyǵarylǵan kitapty halyqqa jan-jaqty nasıhattaýǵa, birlese otyryp túsindirýge shaqyramyn», – dedi Bas múftı.

Erjan qajy Malǵajyuly Ulttyq kitaphana qoryna «Janaza jáne jerleý rásimderi» kitabynyń birneshe danasyn syıǵa tartty.  Kitap 11 myń danamen jaryq kórgen.            

Dóńgelek ústel barysynda jýrnalıster men zııaly qaýym ókilderi óz usynystaryn aıtyp, oń pikirlerin bildirdi.

«Men osy rette bir usynys aıtqym keledi. «Janaza jáne jerleý rásimderi» kitabynyń tırajyn kóbeıtip, elimizdegi barlyq kitaphanalarǵa tegin taratsaq. Sonymen qatar, telearnalarda arnaıy baǵdarlamalar ashylyp, kitapta aıtylǵan másele keńinen nasıhattalsa nur ústine nur bolar edi. Sonda ǵana biz urpaǵymyzdy jaman ádetter men teris qylyqtardan aman alyp qalar edik», – dedi «Túrkistan» gazetiniń jýrnalısi Kólbaı Adyrbekuly.