Pavlodarlyq jigit ákesiniń máıitin ne sebepti tórt aı saqtap kelgen?

Pavlodar qalasyndaǵy kópqabatty úılerdiń biriniń balkonynan tórt aı buryn qaıtys bolǵan qart adamnyń denesi tabyldy, dep habarlaıdy Qamshy aqparattyq agenttigi baq.kz-ke silteme jasaı otyryp.

Bul týraly kópqabatty úıdi jaılaǵan jaǵymsyz ıiske shaǵymdanǵan turǵyndar habarlap, qutqarýshylardy shaqyrǵan. Olardyń aıtýynsha, kún jylynǵaly beri úıdiń dálizinde jaǵymsyz ıis shyǵa bastaǵan.

«Bastapqyda ıt nemese mysyq ólip qalǵan dep topshyladyq. Jaǵymsyz ıistiń sebebin anyqtamaq boldyq. Ulymen birge turatyn qart azamattyń páterine kúmánmen qaraı bastadyq. Sebebi, esikterin eshkim ashpady. Qutqarýshylardyń kómegine júginýge májbúr boldyq», - deıdi kýágerler.

Qutqarýshy top qarttyń úıine kelgen sátte onyń 52 jastaǵy uly bolypty. Záresi ushqan ol besinshi qabattyń terezesinen sekirip ketken. Pavlodar oblystyq ishki ister departamenti baspasóz qyzmetiniń habarlaýynsha, marqumnyń uly mas bolǵan, óziniń is-áreketine jaýap bere almaǵan.

«Er azamat terezeden sekirip ketip, birinshi qabatta ornalasqan ǵımarattyń tóbesine qulap tústi. Dereý aýrýhanaǵa jetkizildi, jaraqat alǵan. Keıin anyqtalǵandaı, turǵyn densaýlyq jaǵdaıy boıynsha arnaıy medısınalyq esepte turǵan», - deıdi oblystyq IID baspasóz qyzmetiniń hatshysy Baıan Maǵzumova.

Polıseılerdiń sońǵy málimetterine súıensek, 52 jastaǵy azamat esh jerde jumys istemeıdi. Sońǵy jyldary týǵan-týysqandarymen baılanysyn úzgen.

Tártip saqshylarynyń málimetinshe, 77 jastaǵy zeınetker ústimizdegi jyldyń qańtarynda kóz jumǵan. Sol kezden beri marqumnyń denesi balkonda jatypty.

Mamandardyń boljamynsha, 52 jastaǵy azamattyń ákesin jerleýge qarajaty bolmaǵan. Osyndaı qadamǵa barýdyń sebebi osy jaıt bolýy múmkin.

Aıta keteıik, osy tektes oqıǵa oblys ortalyǵynda 14 jyl buryn bolǵan. Sol jyly páterdiń ishinen mýmııaǵa aınalǵan jas áıeldiń múrdesi tabylǵan.