Qyrǵyz aǵaıyn jer silkinisine daıyn bolmaı shyqty

 2017 jyldyń 3 mamyrynda Qyrǵyzstanda bolǵan qýatty jer silkinisi saldarynan 66 turǵyn úı men áleýmettik mańyzy bar tórt nysan qırap, apat jaǵdaıynda tur. Taǵy 200-den asa úıdiń qabyrǵalary jarylǵan,-dep habarlaıdy Qamshy aqparattyq agenttigi Qyrǵyzstan Respýblıkasynyń Tótenshe jaǵdaılar mınıstrligine silteme jasap.

Qutqarýshylar taýly aımaqtarda ornalasqan bes aýyldaǵy jalpy úsh júzdeı úıdi qarap shyqqan. Jerasty dúmpýleriniń epısentri Tájikstan aýmaǵynda bolǵan. Onyń qýaty 7 ball boldy, al Qyrǵyzstanda 4-5 ball dúmpýler sezilgen.

 Eldiń Tótenshe jaǵdaılar mınıstrligi jáne jergilikti bılik organdarynyń qyzmetkerleri qatarynan qurylǵan arnaıy komıssııa turǵyn úıler men áleýmettik nysandardy aralap júr. Turǵyndardyń birazy qaýipsiz jerge kóshirildi. Qazir ótemaqy tóleý máselesi qarastyrylyp jatyr. 

 "Bizdiń ókilder men ákimdik qyzmetkerleri qazir baspana qoryn zerttep, shyǵyn kólemin anyqtaýy kerek. Jergilikti bılik organdary jer silkinisinen úıleri qıraǵan otbasylarǵa ótemaqy berý máselesin sheshedi. Al bizdiń qyzmetkerler adamdardy qaýipti jerlerden májbúrlep kóshirý týraly uıǵarym shyǵarady. Muny búgin-erteń aıaqtaımyz degen oıdamyn", - deıdi Qyrǵyzstan TJM-niń baspasóz hatshysy Elmıra Sherıpova.

Ázirshe zardap shekken otbasylarǵa ýaqytsha baspana retinde palatkalar ornatyldy. Jalpy bes oryndyq 100 palatka bólindi.