Ákesin handaı kút! Balań patsha bolady!

Qazaq analaryna hat.

Búgin balalar kúni. Olar – táp-tátti, perishte kóńil! Olardyń kishkentaı ǵana sanasynda mynaý dúnıeniń esebi men qısaby joq. Shyn qýanady, shyn jylaıdy, shyn saǵynady, shyn jaqsy kóredi. Qulaqpen estigenge emes kózben kórgenge senedi. Ul bolsa ákesine, qyz bolsa sheshesine qarap boı túzeıdi. Onyń eseıgende «tekti» ne «teksiz» atanýy osy kezden bastalady.

Esigine eki kisi, tórine tórt kisi otyryp kórmegen otbasydan úsh úıdiń basyn qosar ul shyǵady deý jalǵanshylyq. «Atasy topqa kirmegen sózge salmas qulaǵyn» dep Shortanbaı babamyz osyndaıdy aıtady. Dinim – ıslam, uranym – Alash deıtin qazaq balasy úshin otbasynda ákeniń oryny aıryqsha. Shyndyǵy – áke otbasynda «han» bolsa, bala bolashaqta patsha bolam dep ósedi. Áke shańyraqtyń quly bolsa, urpaǵy quldyń quly bolady.

Balasy jaýǵa shapsa, anasy «oq jaýyryńnan tımesin» dep batasyn sert ustaıtyn jurtpyz. Bul jaýdan qashpa degen sóz. Ulyna ketigi bar kesemen shaı ishkizbeıtin, kıimin attap ketken shúıkebasty «erkek syılap kórmegen» dep sybap alatyn da sol Alashtyń analary. Myna zaman Qajyǵumar atamyz aıtatyn«ker qamshy keregeden yrshyp túsip, basynda sheshemizdiń oınaıtuǵyn» dáýren emes. «Áke syılap kórgen» áıel úshin erdiń basyn tórge súıreý qıyndyq týdyrmaıdy. Muny aıtyp otyrǵanymyz, balaǵa «adam óskende mynadaı bolý kerek, anadaı bolý kerek» dep emes otbasynyń ózinde úlgi kórsetkenimiz abzal. Kúıeýin syılaı almaǵan ana erteń kelinine ulymdy syıla dep aıta almaıdy.

Biz Abaıdaı uldy dúnıege ákelgen qazaq analarynyń qasıetin tizbelep otyrmadyq. Tabysqa jetken kez kelgen erekektiń artynda ne tektiden alǵan jary, ne tektini týǵan anasy turady. Bul aqıqat.

Qazaq analaryna aıtarymyz sol: ákesin handaı kút! Balań patsha bolady!

«Qamshy»

Sýret: «Minberden»