"ÁKE – ASQAR TAÝ" ekendigin esińizden shyǵarmańyz!

Jýyrda Almaty qalasy Qoǵamdyq damý basqarmasynyń qoldaýymen «Social project management» ortalyǵy «Áke - asqar taý» jobasy aıasynda «Salt - dástúrlerdiń tárbıelik máni» taqyryby boıynsha Elektromehanıkalyq kolledjiniń stýdentterimen kezdesý uıymdastyrdy. Jobanyń negizgi maqsaty – óskeleń urpaq pen jas jubaılar arasynda Áke beınesin, ózara syılastyqty, otbasyn tárbıeleý, otbasy qundylyǵy, qarym-qatynas, psıhologııalyq rýhanı baǵyt berý bolatyn-dy.

Kesh qonaǵy retinde baıyrǵy taý - ken ınjeneri, qarymdy qalamger О́skenbaı Qulataıuly kóke shaqyryldy. Muny basa aıtyp otyrǵanymyz, qoldaryńyzdaǵy aımaqtyq «Sharaına  - Seıhýn» gazetinde áserli áńgimeleri men tanymdyq materıaldary arqyly oqyrmanǵa keńinen tanylǵan ardaqty azamattyń jastarǵa da ózindik aıtary barlyǵyna eske salý edi. Kezinde Kentaý qalasy mańyndaǵy ken oryndarynda basshylyq jasaǵan tájirıbeli maman óndiristi óristetýmen qatar kenish qyzmetkerleriniń áleýmettik - turmystyq jaǵdaıynyń kóterilýine mán berýimen moraldyq turǵyda da óz ortasyna úlgi bolǵan úlken júrekti adam. Árdaıym týralyǵymen ádildikti Tý etip ustar adamı qasıetimen jamaǵatynyń qurmetine bólengen aqsaqaldy úlgili áke ǵana emes, nemere, shóbere ósirip otyrǵan, japyraǵyn keńge jaıǵan máýeli báıterektiń dini desek te artyq emes. Zeınetkerlik kezinde de jastaı qalyptasqan eńbekkerlik qalybynan tanbaı, qalamynan mándi sóz tógilgen, birneshe kitaptyń avtory bolǵan tynymsyz kisi.

Kezdesý barysynda kesh qonaǵy О́skenbaı Qulataıuly stýdentterge óz ákesi men anasy tarapynan alǵan tárbıesimen oı bólisip,  atalmysh keshtiń tartymdy da, tolǵamdy bolaryn tilge tıek etti. Jastardyń mamandyq tańdaýmen qatar jar tańdaýdan da qatelespeýi kerek ekenin de qaperlerine saldy.

–Ár januıanyń tuǵyry Áke! Ákege qarap, bala ósedi. Ákeniń árbir basqan qadamy, istegen tirligi, sóılegen sózi bala úshin tárbıe. Sondyqtan da ár otbasy ıesi óziniń ár is-áreketin aqylmen jónge salyp otyrýy kerek. Sózi basqa da, isi basqa adamnyń ónegesi eshkimdi eliktirmesi anyq. О́zderiń de ákelerińe qarap boı túzep, ósip kelesińder. Sender de erteń bir - bir shańyraqty basqarar úlken bolasyńdar. Biraq jaqsy áke bolý úshin aldymen jaýapkershiligi joǵary jaqsy maman retinde qalyptasyp, bir shańyraqty ustap tura alamyn - aý degen kezde otbasy qurǵan abzal. Sebebi, otbasy qurý, áke bolyp bala tárbıleý nemquraıly qaraıtyn nárse emes, qaraqtarym, – degen qarııa sózi tyńdaýshylarǵa qozǵaý saldy. Stýdentter áserli áńgimeni onan ári qozdatyp, ózderiniń kókeıindegi saýaldaryna tálimdi jaýaptar aldy. Bul sharanyń qyzyqty ba, tartymdy bolǵanynyń belgisi.

Shara barysynda keshtiń basty qonaǵy О́skenbaı Qulataıulynyń nemeresi Arman «Jeruıyq Qazaqstanym» ánin oryndasa, shóberesi Ermuhammed qazaq kúılerin shertti. Bul ata urpaǵynyń tálimdi, tárbıeli bolýymen qatar ónerge de qushtarlyqpen qaraıtyndyǵynyń naqty dáleli edi.

Atalmysh sharanyń tálimdi ótýine oqý ornynyń ustazdary men tálimgeleri muryndyq bolyp, belsendilik tanytty.  

Jas urpaq, Áke – asqar taý ekendigin esińizden shyǵarmańyz!