Beseýdiń ornyna úsh emtıhan: Qazaqstanda oqyǵysy keletin qandastarǵa birqatar jeńildik jasalmaq

Qazaqstan Respýblıkasynyń azamaty emes, biraq ulty qazaq adamdar úshin joǵarǵy oqý oryndaryna oqýǵa túsýge osy jyldan bastap jańa jeńildetilgen talaptar engizildi. Bul týraly "Otandastar" qorynyń baspasóz qyzmeti habarlady. 
Qandastar úshin kelesi jeńildikter qarastyrylǵan.

Birinshiden, Qazaqstan Respýblıkasynyń azamaty bolyp tabylmaıtyn ulty qazaq adamdar úshin UBT tapsyrǵan kezde shektik ball bolmaıdy.
Ekinshiden, bes emtıhannyń orynyna úsh emtıhan tapsyrady (oqý saýattylyǵy jáne tańdaǵan baǵyt boıynsha eki beıindik pánnen)
Úshinshiden, tórt joǵarǵy oqý ornyn jáne bilim berý baǵdarlamasyn tańdaýǵa múmkindik saqtalyp qaldy.
Tórtinshiden, qazaq tilin tolyq meńgermegen azamattarǵa orys tilinde tapsyrýǵa múmkindik saqtaldy.

"Qurmetti qandas talapkerler! 13 shildeden bastap, memlekettik bilim grantyn alýǵa qujattar qabyldaý bastaldy. Oǵan talapkerlerden 13-20 shilde aralyǵynda memlekettik bilim granttaryn taǵaıyndaý konkýrsyna qatysý úshin qujattar qabyldanyp jatyr. Sý tasqyny bolǵan aımaqtyń (Aqmola, Aqtóbe, Atyraý, BQO, Qostanaı, SQO) talapkerleri úshin 13-24 shilde aralyǵynda qabyldanady. Kez kelgen talapker Qazaqstannyń barlyq joǵary oqý ornyna qujattaryn tapsyra alady jáne ol onlaın túrinde de júzege asyrylýda. Memlekettik bilim berý granttaryn taǵaıyndaý QR Ǵylym jáne joǵary bilim  mınıstrliginiń qurǵan komıssııasynyń sheshimimen belgili bolady. Osy rette, Qazaqstan Respýblıkasynyń azamaty bolyp tabylmaıtyn ulty qazaq úmitkerler qujattaryńyzdy grant ıegeri bolýǵa tapsyrýǵa asyǵyńyzdar", – delingen habarlamada.