Onlaın qurban shalýǵa arnalǵan qurban2024.kz saıty iske qosyldy

Qazaqstan musylmandary dinı basqarmasy qurban shalý rásimin qashyqtan ótkizýge arnalǵan qurban2024.kz saıtyn iske qosty.

Saıt qyzmetin tóralqa májilisinde QMDB Sıfrlyq damý bóliminiń meńgerýshisi Tımýr Serikhanuly tanystyrdy. Dinı basqarmanyń málimetinshe, halyqqa, ásirese úlken qalalarda turatyn jamaǵatqa ońtaıly bolý úshin osyndaı sheshimge kelgen. Bıyl da qurban shalý oflaın jáne onlaın formatta júzege asady.

“Onlaın túrde qurban shalam deýshiler saıt arqyly qurbandyq malyn tańdap, Kaspi QR arqyly qajet qarajatty aýdara alady. Qoı men eshkini jeke adam, al iri qara men túıe malyn 1 nemese 7 adam birigip shalsa bolady. Tapsyrysyńyz sátti ótse, uıaly telefonyńyzǵa SMS habarlama keledi. Qurbandyq shalynǵan soń onyń foto jáne beıne esebi tapsyrys berýshi kórsetken nómirge jiberiledi”, – delingen habarlamada.

Saıtta belgilengen baǵa boıynsha Astana qalasynan bolsańyz, bir qoıdyń quny – 75 myń teńge, al almatylyqtar 72 myń teńgege bir qoı satyp alyp, onlaın qurbandyq shalsa bolady. 

Dinı basqarma iske qosqan saıtta qurban shalýǵa tapsyrys berseńiz bolady. Et muqtaj jandarǵa taratylatyndyqtan olar qurban etine tapsyrys berip, ótinish qaldyra alady.