"Búıregin ezip, bas súıegin syndyryp, temekini arqasyna basqan": Almatydaǵy áskerı bólimde qaza tapqan sarbazdyń eksgýmasııa qorytyndysy shyqty

Almaty qalasynda áskerı boryshyn óteýge ketken Almas Shahımovtyń otbasyna eki aıdan soń qaraly habar kelgen. Ol kezde ólimniń resmı sebebin jazataıym oqıǵa dep bergen. Sarbaz oqý jattyǵý kezinde ózgelerge qaýipsiz jerge barýǵa kómektesip, ózi qatty daýyldyń áserinen qulaǵan metal jabdyqtyń astynda qalyp, mert boldy delingen. 

- Alǵashynda bizde kóptegen aıǵaq dálelder bolǵandyqtan eksgýmasııa jasatýǵa qarsy boldyq. Alaıda áskerıler keıin barlyq aıǵaqty, ulymnyń áskerı kıimderin, polıgondaǵy beınejazbalardyń bárin joıdy, – dedi Almastyń anasy. 

Derekterge sensek, osynsha ýaqyt ótkennen soń marqumnyń týystarynyń kúdikteri rastalǵan.

“Máıit saraptamasynan oń jaǵynan úsh pyshaq jaraqaty, qylqyndyrǵany baıqalǵan izder, 26 dene jaraqaty anyqtalǵan. Onyń búıregin ezip, bas súıegin syndyryp, arqasyna temeki basyp, sóndirgen”, – dep qosty anasy.

Odan bólek, anasynyń aıtýynsha, Almas baǵynyshty bolǵan ofıser áskerge qabyldana sala jigittiń atyna nesıe alǵyzǵan. 

“Almasty áskerge kózine ota jasalǵan soń birden alyp ketti. Olar dárigerlerdiń otadan soń jarty jyl fızıkalyq kúsh salýǵa bolmaıdy degen tyıymyna qaramady. 27 mamyr ony alyp ketti. Mamyrdyń 28-i kúni ulym Almatyǵa jetti. 29-da áskerı bólimine jetip, 30-da onyń atyna nesıe rásimdelgen”, – dedi anasy. 

Almastyń otbasy eki jyldan beri ádildik úshin kúresken. Tipti olarǵa áskerılerdiń ózi materıaldyq ótemaqy tóleıtinin, aqsha, páter men kishi qyzdaryn oqýǵa túsirýdi usynǵan.

Ulttyq gvardııa tipti sarbazǵa erligi úshin marapat ta bergen. Alaıda jaqyndary bul marapattan bas tartqan. Sebebi olar Almastyń shańdy daýyldan ózgelerdi qutqaryp emes, bireýdiń qolynan mert bolǵanyna senimdi. 

Eske salsaq, buǵan deıin Almatyda boryshyn ótep júrgen sarbazdyń qumdy daýyl kezinde kóz jumǵany týraly habarlaǵan edik. 5574 áskerı bóliminde boryshyn ótep júrgen sarbaz oqý ortalyǵynda dalalyq jattyǵýda bolǵan kezde kóz jumǵan. Vedomstvo málimetine sáıkes, qatty jel saldarynan shatyrdyń temir jaqtaýy basyna tıgen.