Qazaqstannyń sý qoımalaryna 75 mlrd tekshe metr sý jınaldy

Bul ótken jylmen salystyrǵanda 15 mıllıard tekshe metrge artyq. Sonymen qatar, jınalǵan sýdyń 12 mıllıardtan astamy – tasqyn sýy, dep habarlady QR Sý resýrstary jáne ırrıgasııa mınıstrligi.
Byltyr elimizdiń aýyl sharýashylyǵy salasyna 14 mlrd tekshe metr sý jumsaldy. Al 2023 jyldyń qorytyndysy boıynsha jalpy elimizdiń qajettiligi úshin jaratylǵan sýdyń kólemi – 24,4 mlrd tekshe metr. 
Qazaqstannyń sý qoımalary 89 mlrd tekshe metr sý jınaı alady.

"Elimizde tasqyn sýyn jınaý jumysy áli jalǵasyp jatyr. Sý tasqyny kezeńi bastalǵannan beri Balqash kóline 3,3 mlrd tekshe metr, Kaspıı teńizine shamamen 6 mlrd tekshe metr sý jiberildi", – dedi Sý resýrstary jáne ırrıgasııa mınıstrliginiń resmı ókili Móldir Ábdýalıeva.