Din salasyndaǵy barlyq almatylyqtar qatysa alatyn baıqaý ótedi

2024 jylǵy 10 sáýirde Almaty qalasynda Din isteri jónindegi basqarmasynyń tapsyrysy boıynsha «JASTAR» damytý ortalyǵy»  jastar qoǵamdyq birlestiginiń uıymdastyrýymen «Birneshe nomınasııalar boıynsha din salasynyń ózekti máseleleri týraly úzdik materıaldardy (maqalalar, áleýmettik rolıkter jáne t.b.) daıyndaý baıqaýy» boıynsha baspasóz konferensııasy ótti.

Konferensııa barysynda Almaty qalasy Din isteri jónindegi basqarmasynyń ókili Baqdáýlet Halılýllauly baıqaýdy uıymdastyrýdaǵy maqsat-mindetteri, baıqaý sharttary men erejesin tanystyrdy. Baıqaýdy uıymdastyrýdaǵy maqsat – jurt nazaryn din salasyndaǵy memlekettik saıasattyń ózekti máselelerine aýdarý. Buqaralyq aqparat quraldary men áleýmettik jeliler arqyly halyqty din salasyndaǵy memlekettik saıasattyń mańyzdy baǵyttary men ekstremıstik jáne radıkaldy dinı aǵymdar ıdeologııasynyń zııandylyǵynan habardar etý. Jýrnalıster men BAQ-ty, sondaı-aq din salasyndaǵy ózekti máseleler boıynsha materıaldar jarııalaıtyn basqa da tulǵalardy qoldaý.

Erejege sáıkes baıqaý 10 nomınasııa boıynsha ótkiziledi. Jalpy júlde qory – 3 050 000 teńge.

Baıqaý kelesi nomınasııalar boıynsha ótkiziledi:

1. Internet-resýrstaǵy qazaq tilindegi úzdik maqala;

2. Internet-resýrstaǵy orys tilindegi úzdik maqala;

3. «Instagram» áleýmettik jelisindegi úzdik beınerolık;

4. «Tıktok» áleýmettik jelisindegi úzdik beınerolık;

5. úzdik áleýmettik beınerolık;

6. Digital Art sheńberindegi úzdik fotojoba;

7. Úzdik óleń;

8. Úzdik úndeý jáne uran;

9. Úzdik pikir;

10. Áleýmettik jelilerdegi úzdik taqyryptyq post.

Baıqaýǵa 16 jastan joǵary Almaty qalasynyń barlyq turǵyndary qatysa alady.

Baıqaýǵa qatysý úshin qatysýshylar óz jumystaryn jáne ózderi týraly aqparatty [email protected] elektrondy mekenjaıyna osy jyldyń 1 qazanyna deıin joldaı alady. Baıqaý týraly tolyq aqparat pen ár nomınasııa boıynsha talaptardy Almaty qalasy Din isteri jónindegi basqarmasynyń resmı saıty men @din_almaty resmı akkaýntynda jarııalanǵan erejeden kórýge bolady.