Kórneki sýret/Petropavlovsk.kz
Soltústik Qazaqstan oblysy Taıynsha aýdanynyń ákimdigi 26 naýryzda qar tazalatýǵa baılanysty kelisimshart jasasty. Aýdan ákimdiginiń jolaýshylar kóligi jáne avtomobıl joldary bólimi qys biter shaqta aýdandyq mańyzy bar joldardyń qaryn kúretýge 20 mln teńge bólip otyr. Ákimdik bul qarjyny «Rassvet» dep atalatyn jeke kásipkerge «tikeleı bir kózden» bergen. Bir qyzyǵy – aýdan ákimdigi úsh aı buryn da dál osy kásipkerge 69 mln teńgeniń tenderin berip, qar tazalaýǵa baılanysty kelisimshart jasasqan. Oǵan sáıkes, jeke kásipker 2024 jyldyń jeltoqsanyna deıin aýdandyq mańyzy bar avtomobıl joldaryn qardan tazartyp otyrýǵa mindetti. Taıynsha aýdanynyń ákimdigi qar kúreýge nege qaıta-qaıta qarjy bólip jatyr? Qamshy tilshisi osy suraqqa jaýap izdep kórdi.
TО́TENShE JAǴDAI
Taıynsha aýdanynyń ákimdigi 26 naýryz kúngi kelisimshartty «tikeleı bir kózden satyp alý» tásili arqyly jasasqan. Bul – tapsyrys berýshi oryndaýshyny anyqtarda ashyq konkýrs ótkizbeı, merdigermen tikeleı kelisimge keletin tender tásiliniń bir túri.
Kez kelgen memlekettik satyp alýdy mundaı tásil arqyly ótkizýge ruqsat joq. Memlekettik satyp alý týraly zańǵa sáıkes, kelisimshartty tikeleı bir kózden jasaýǵa 50-den asa norma bar. Tapsyrys berýshi kelisimshartty solardyń biri arqyly negizdeýge mindetti.
Taıynsha aýdanynyń ákimdigi «Rassvet» JK-men jasasqan kelisimshartyn Memlekettik satyp alý týraly zańnyń 39-baby, 3 tarmaǵynyń, 4-tarmaqshasy arqyly negizdegen. Atalǵan zań normasy tótenshe jaǵdaı bolyp, sonyń saldaryn joıýǵa týra kelgen kezde nemese apatty jaǵdaıdyń aldyn alýǵa májbúr bolǵan kezderde ǵana qoldanylady.
Bul tásildi qoldanatyndaı Taıynsha aýdanyn kóktem shyqqanda kenetten qar basap qaldy ma? Bul suraqtyń jaýabyn bilý úshin ákimdikke habarlastyq. Aýdan ákimdiginiń jolaýshylar kóligi jáne avtomobıl joldary bóliminiń basshysy Dmıtrıı Rýdenko bylaı jaýap berdi:
– Aýdandy qar basyp qaldy. Qazir 15 tehnıka jumys istep jatyr . Tender jarııalap, kútip otyratyn ýaqyt bolǵan joq. Sondyqtan satyp alýdy tikeleı bir kózden ótkizdik, – dedi.
Kelisimshart 26 naýryz kúni jasalyp otyr. Al Qazaqstandaǵy aýa raıy jóninde aqparat taratatyn saıttardyń málimetinshe, keıingi kúnderi Taıynsha aýdanyna qalyń qar jaýmaǵan. Mysaly, 27 naýryzda 5 gradýs jyly boldy dep tur.
JELTOQSANDAǴY 70 MLN JETPEDI ME?
Memlekettik satap alý portalynyń dereginshe, Taıynsha aýdanynyń ákimdigi úsh aı buryn, 2023 jyldyń 12 jeltoqsanynda aýdan joldaryn qardan tazartýǵa dep 69 mln teńgege jýyq qarjy bólgen. Ol kezde de tender «Rassvet» jeke kásipkerine berilgen. Ákimdik ol kezde de «tótenshe jaǵdaı» degen jeleýmen kelisimshartty «tikeleı bir kózden» jasaǵan.
Úsh aı burynǵy kelisimge sáıkes, «Rassvet» JK Taıynsha aýdanyndaǵy joldardy 2024 jyldyń jeltoqsanyna deıin qardan tazartyp otyrýǵa mindetti bolǵan. Portalda ol kelisimsharttyń áli de kúshinde ekeni, soǵan saı merdigerge 20 naýryzda kelimshartta kórsetilgen 69 mln teńgeniń túgel tólenip bitkenin kórinip tur.
2023 jyldyń jeltoqsan, 2024 jyldyń qańtar, aqpan, naýryz, sáýir, qarasha, jeltoqsan aılaryna dep bólingen 69 mln qalaısha tórt aıǵa jetpeı taýsyldy? Aýdan ákimdiginiń jolaýshylar kóligi jáne avtomobıl joldary bóliminiń basshysy Dmıtrıı Rýdenkonyń aıtýynsha, bıyl qar jyldaǵydan qaraǵanda áldeqaıda qalyń túsken. Ol sondyqtan úsh aı burynǵy qarjy jetpeı qaldy dep otyr.
Rýdenkodan ákimdik ne sebepti jeltoqsanda da tenderdi konkýrssyz ótkizdi dep suradyq.
Ol «máslıhat qar kúreýge bólinetin qarjyny kesh maquldady. Maquldanǵan kezde qar túsip ketti. Sondyqtan tenderdi konkýrs jarııalamastan bir kózden berdik» deıdi.
Negizi qar kúreýge bólinetin qarjy jyldyq josparǵa aldyn ala engiziledi. Taıynsha aýdanynyń sheneýnikteri qar bıýdjetin nege kesh bekitti? Osy suraqqa jaýap alý úshin aýdany ákimi Berik Áljanovqa habarlasqanbyz. Aýdan basshysy «anyqtap alyp, jaýap bermin» degenimen keıin telefonǵa jaýap bermeı qoıdy.
Jeltoqsandaǵy 69 mln men 26 naýryzdaǵy 20 mln teńgeni qosqanda Taıynsha aýdanynyń ákimdigi bir maýsymǵa qar kúreýge 90 mln teńge jumsap otyr. Bul az ba, kóp pe? Salystyryp kóreıik.
Taıynshada aýdandyq mańyzy bar avtomobıl joly 632 shyqyrym. Aýdan ákimdigi jylda osy joldy qardan tazalaýǵa qarjy bóledi. Memlekettik satyp alý portalyndaǵy málimetke qaraǵanda, aýdan ákimdigi byltyr da, 2022 jyly da qar kúreýge 20 mln teńge kóleminde qarjy jumsaǵan. Al bıyl ne sebepti qar tazlaýǵa jyldaǵydan 4 ese kóp qarjy jumsaǵany kúmándi.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir