• USD 468.56

  • EUR 497.56

  • RUB 7.3

  • CNY 67.18

24 Sáýir, 22:30:28
+35°

Petropavl qalasynyń ákimdigi bir aptanyń ishinde quny 400 mln teńgeden asatyn eki tenderdi bir kompanııaǵa ashyq konkýrssyz berdi. Qos tenderdi «tikeleı bir kózden» alǵan «Dorsıgnal» JShS Petropavl ákimdiginen alǵash ret konkýrssyz tapsyrys alyp otyrǵan joq. Memlekettik satyp alý portalynyń málimetinshe, ákimdik 2016 jyldan beri atalǵan kompanııaǵa 22 memlekettik tapsyrysty «tikeleı bir kózden» bergen.

410 MILLIONNYŃ MEMTAPSYRYSY

14 naýryzda Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi «Dorsıgnal» kompanııasymen kelisimshart jasasty. Quny – 199,6 mln teńge. Oǵan sáıkes, merdiger kompanııa Petropavl qalasyndaǵy baǵdarshamdarǵa avtomattandyrylǵan basqarý jónindegi qyzmet kórsetýge tıis.

Arada bir apta ótken soń, 20 naýryzda Petropavl ákimdigi men «Dorsıgnal» JShS taǵy da kelisimge otyrdy. Onyń quny – 211 mln teńge. Bul qomaqty qarjy «Dorsıgnal» kompanııasyna jol belgilerin ornatý úshin berilip otyr.

Memsatyp alý portalynyń málimetinshe, ákimdik qos kelisimshartty jasarda da «tikeleı bir kózden satyp alý» deıtin tásildi qoldanǵan. Iаǵnı, tapsyrys berýshi tender jeńimpazyn anyqtarda eshqandaı konkýrs ótkizbeı, tapsyrysty tikeleı «Dorsıgnal» kompanııasyna berip otyr.

Tenderdi bulaı ótkizý úshin qandaı da bir negiz bolýǵa tıis. Petropavl ákimdigi eki rette de Memlekettik satyp alý týraly zańnyń 39-baby, 3 tarmaǵynyń, 4-tarmaqshasy arqyly negizdegen.

Atalǵan zań normasy  tótenshe jaǵdaı bolyp, sonyń saldaryn joıýǵa týra kelgen kezde nemese apatty jaǵdaıdyń aldyn alýǵa májbúr bolǵan kezderde ǵana qoldanylady. Mysaly, qalada qatty jel turyp, baǵdarshamdar qırap qalsa, nemese bir ǵımarat apatty jaǵdaıda tursa, jóndeý jumystaryn jedeldetý úshin dereý arada tapsyrys berýshi bir kompanııaǵa usynys tastap, sonymen kelisimge keledi.

Al Petropavl ákimdiginiń kelisimshartyna qarap qandaı da bir «tótenshe jaǵdaıdy boldy» deýge negiz joq. О́ıtkeni jol belgilerin qoıý jáne baǵdarshamdardyń baǵdarlamasyn ornatý tótenshe jaǵdaıdyń saldaryn joıý degen normaǵa negiz bola almaıdy.

Buǵan qosa, qos kelisimde de merdigerge 2024 jáne 2025 jyldar aralyǵynda qyzmet kórsetip otyrý júktelgen. Mundaı birneshe jyldyq, jyldar boıy qyzmet kórsetip otyrýǵa tıis jumystar tótenshe jaǵdaıdyń saldaryn joıýǵa arnalǵan degenge kelmeıdi. Negizi mundaı jumystar úshin tapsyrys berýshi ashyq konkýrs ótkizýge tıis.

Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi «Qamshy» tilshisine tender ne sebepti ashyq konkýrssyz ótkizgenin túsindirmedi. Bólim basshysy Erkin Eleýsizovpen sóılesý múmkin bolǵan joq. Al memlekettik satyp alýǵa jaýapty maman bir aı demalystan keıin jumysqa endi shyqqanyn, tenderlerdiń ne sebepti konkýrssyz ótkeninen beıhabar ekenin aıtty.

PETROPAVL ÁKIMDIGINIŃ «SÚIIKTI» KOMPANIIаSY

Ashyq konkýrspen ótýge tıis tenderdi esh básekesiz alǵan «Dorsıgnal» JShS – Petropavlǵa tanymal kompanııa. 2005 jyly qurylǵan seriktestiktiń sol kezden bergi basshysy ári jalǵyz quryltaıshysy – Nıkolaı Lazarev degen adam.

Kompanııa Petropavlda tirkelgen. 2019 jyldan beri memleketke 200 mln teńgeden astam salyq tólegen. Kompanııa negizinen jol belgilerin ornatý, baǵdarsham jóndeý sııaqty memlekettik tapsyrystardy oryndaıdy.

Memsatyp alý portalynyń málimetinshe, «Dorsıgnal» JShS 2016 jyldan beri 266 tender alǵan. Onyń 179-y «tikeleı bir kózden» berilgen.

Seriktestik kóbine Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń tapsyrysyn oryndaıdy. 2016 jyldan beri atalǵan mekemeden 62 tender alǵan. «Dorsıgnal» JShS onyń 22-sine esh konkýrssyz, «tikeleı bir kózden» qol jetkizgen.

Petropavl ákimdigi kompanııaǵa ár jyldary eń iri tenderlerdi konkýrssyz berip otyrǵan. Ákimdik tapsyrystyń bir kózden berilýin Memlekettik satyp alý zańyndaǵy «avtorlyq quqyq», «tótenshe jaǵdaıdyń saldaryn joıý» degen normalar arqyly negizdegen. Alaıda bir kózden berilgen tenderlerdiń tehsıpattamasy ol normalarǵa sáıkes kelmeıtinin baıqaýǵa bolady.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir