«Jańa Qazaqstan» jemqorlardy mektepten taýyp jatyr

Qazaqstandaǵy jemqorlyq basqasyn aıtpaǵanda kádimgi mektepte de órship tur. Balamyzǵa bilim beretin salada da túıeni túgimen jutatyndar júrgen soń ne suraısyz?

 Jýyrda Almaty oblysy Ile aýdany bilim bóliminiń basshysynyń 680 mln teńge jymqyrǵany jaǵa ustatty. Sumdyq qoı, sumdyq bop jatyr. Sońǵy bir aıdyń Qazaqstan boıynsha birtalaı mektep dırektory, mektep býhgalterleri, bilim bóliminiń basshylary ustaldy. Áli ustalmaǵany qansha deseńizshi.

Balyq basynan shirıdi. Belgili ustaz Aıatjan Ahmetjanulynyń sózinshe, mekteptiń basshysy bastamasa, býhgalterler óz betimen qarjyny jymqyra almaıdy.

– Biz buryn «jemqor sheneýnik» degendi jıi estýshi edik, endi qazir jemqor esepshi, jemqor dırektor degendi aıtatyn boldyq. Bizdegi jemqorlyq tutas júıede, sodan qoǵamnyń ózine sińirilgen. Mekteptegi jemqorlyq búgin bastalǵan joq, burynnan bar. Tek sońǵy jyldary orta bilim salasyndaǵy jemqorlyq shetinen ashylyp jatyr. Durys, ashyla bersin, jemqorlyq joıylmaı ádiletti qoǵam bolmaıdy, biz ilgeri baspaımyz.

Birinshiden, mektep dırektorlary ekonomıka men qarjy jaǵynan, esepshiler óz mamandyǵy men IT turǵysynan saýatsyz. Keıde basshysy saýatsyz býhgalter bilgenin isteıdi. Keı dırektor qol qoıatyn elektrondy sıfrlyq qoltańbasyn býhgalterge berip, solarǵa senip otyra beredi.

Men qazir mektepte dırektor bolyp júrgen jandardy eki topqa bólemin. Biri – uzaq ýaqyt basshylyq qyzmette jumys istep úırenip qalǵandar, ekinshisi – maqsatty túrde dırektor bolǵandar. Maqsaty – aqsha, mánsap bolǵandar. Olar shamasy kelse ózi jeıdi, nemese býhgalterine jegiztedi. Dál osy jerde júıeni rettemeı, bul jemqorlyqty tizgindeý múmkin emes. Qazir elimizde 500-den astam mektepte dırektor joq, mindetin atqarýshylar otyr. Olar – ýaqytsha, amalsyz otyrǵandar. Ekonomıkalyq máselege bas qatyrǵysy kelmeıdi. Sondyqtan da býhgalterge jeýge jeńil. Sondaı-aq, keı óńirlerde mektepke jumysqa turý 2,5 mln teńge turady eken, ony Antıkor da, ákimdik te, eldiń bári de biledi. Biraq bári túk bilmegendeı bop otyr. Nege? Osydan-aq bári túsinikti.

Mektep jemqorlyqtan qutylmaı, memleket jemqorlyqtan eshqashan qutylmaıdy. Nemese kerisinshe, memleket jemqorlyqtan qutylmaı, mektep jemqorlyqtan qutylmaıdy, – dedi ustaz.