«Vagon da joq, aqsha da joq» dep turmasa...

Zeınetaqy qorynan 170 mlrd teńge «Báıterek» holdıngine bólingen eken. Ol qarajat júk jáne jolaýshylar vagondaryn satyp alýǵa jumsalady. Bul týraly ulttyq ekonomıka mınıstri bolǵan Álibek Qýantyrov málimdegen bolatyn. Onyń túsindirýinshe, zeınetaqy qoryndaǵy aqshany ınvestısııalaýdyń eń tıimdisi ári senimdisi – «Báıterek» holdıngi.

Zeınetaqy qory – halyqtyń jınaǵan aqshasy, árıne halyq buǵan alańdaýly.

– 15 jyl boıy 13% kiristilik berip turǵan «Báıterek» pen «Samuryq-Qazyna» oblıgasııalary bizdiń zeınetaqy qarjymyzdy kóbeıtýge jaqsy yqpal etpek. 173 mıllıard teńgeden biz jyl saıyn 22,49 mıllıard teńge kiristilik alamyz dep sanasaq, 15 jylda ol 337,35 mıllıard teńge bolady. Sonda 173 mıllıard teńge 510 mıllıard teńge bolyp qaıtpaq. Joǵary ınflıasııa fazasynan óttik dep sanalǵandyqtan, tipti qazirgi sátpen modeldesek, 9,8% bolatyn ınflıasııa mániniń ústinen 3,2% kiristilik alyp otyramyz. Sondyqtan bul halyq úshin tıimdi, – deıdi ekonomıst Aıbar Oljaı.

Budan qaýip bolmaı ma, holdıngke quıylǵan qarjy erteń qumǵa sý sepkendeı bolmaı ma, degen suraqqa qarjyger bylaı deıdi: 

– «Báıterek» pen «Samuryq-Qazyna» jeke kompanııalar emes. Olardyń barlyq mindettemeleri, qaryzdary memleket tarapynan kepildendiriledi. Sondyqtan Qazaqstannyń sýverendi reıtıngi (S&P: BBB-/A-3, Fitch: BBB turaqty) qandaı, eki holdıngte de sondaı reıtıng bolady. Qarapaıym tilmen aıtsaq, olar 100 paıyz senimdi, alǵan aqshasyn ne bolsa da qaıtara alatyn alpaýyt uıymdar. Sondyqtan bul mámile halyq úshin qaýipsiz.

Zeınetaqy qorynda 18,7 trıllıon teńge aýyr júk bolyp jatyr. Jata bersin desek, ony ınflıasııa jep qoıady. Tabystylyq qýyp startaptardyń aksııalaryn, nemese krıptovalıýta satyp alaıyq desek, onda anyq aqshamyzdy joǵaltýymyz múmkin. Halyqtyń aqshasymen oınaýǵa bolmaıdy. Sol úshin Ulttyq bank barynsha saqtyqpen, 100 paıyz qaıtatynyna senimdi, sonymen birge tabystylyǵy ınflıasııadan joǵary bolatyn qundy qaǵazdardy izdep, solarǵa ınvestısııa jasaıdy, – dedi ekonomıst.